Aizawl March 9, 2021 : MNF Adviser Dr.R.Lalthangliana, H & FW, etc. Minister chuan LMC chu Lunglei khawpui mipui tana rotling, malsawmna leh development tinreng kengtu tur niin ro phum ruk haichhuahna tur niin a sawi. MNF LMC Candidate theh chhuahte chu Lunglei khawpui tana mi thiam leh tha thlan khawm, kohhran leh khawtlang tan pawha mi tangkai, party dang tan pawh zam phahna tur an ni a ti. 

Vawiin MNF ten Saikuti Hall-a LMC-a an party candidate tur an puannahh Dr. R. Lalthangliana chuan, "Municipality Act hi sawrkar laipuiin a duan angin, kum 2007 MNF sawrkar hmasak lai khan LMC hi Assembly House-ah pass a lo nih tawh, kum 2008 MLA inthlanah MNF an tlak tak avanga hun rei tak, a taka kalpui theih loh hnuah tunah a lo hlawhtlin ta hi a lawmawm. Tuna candidate, a sulsutute hi Lunglei khawpui hmasawnna tura ngaihtuahna hmang thiam tur an nih avangin mipuiin an thlan tlin ngei chu an mawh a ni. Kum 2015-a AMC thlan pawh MNF sawrkar kut chhuak a ni a,  Congress sawrkar vanglai takin party malin kan tling a, chutiang bawkin LMC pawh a hringtu leh dintu ngei MNF LMC candidate-te lo thlang tling u la, Lunglei khawpui hian in tangkai pui hle dawn a ni," a ti.

MNF Vice President Lalthlengliana pawhin LMC inthlan lo awm tur atan Lunglei Sub-Headquarters hruaitu te, Minister leh MLA rualte thahnemngaihna leh thawhrimnaah lawmthu a sawi a. LMC-ah hian party pathumten a mal theuha an chuh dawn avangin rulling party candidate-te an tlin ngei a beisei a, ward tinah MNF candidate an that ber thu a sawi. Congress chu hlauhthawnawm an awm lo nia sawiin, ZPM lah a phaw vuak chauha thawm nei lian, a tak tih tham awm lo, 'thawh hma leh phun hma, men rei leh phun rei' thin mai niin a sawi. 

Lalthlenglina chuan candidate te fuihin, "Kum 2023 hi Lunglei history-a dai tawh ngai lo tur, thangtharte tan chhinchhiah tlak tak a ni dawn a, chutah a hmasa ber atana candidate turte in nih avangin in tlin ngei a ngai a ni. Thlan tlin in lo ni ang a, in tu leh faten nakinah 'ka pi/ka pu chu Lunglei LMC rorelna hmasa berah a thu' tiin, chhuang takin an la sawi dawn che u a ni. Kan candidate mi tha tak takte hian kiltin atangin beihna in la tawk dawn chauh a, lo zam reng reng suh u. MNF chu party lian, nghet leh tlo, diamond jubilee pawh lawm tawh kan ni," a ti.

He hunah hian Minister C.Lalrinsanga, HPC Vice Chairman Lawmawma Tochhawng MLA, Dr. Vanlaltanpuia MLA, Dr.K. Pachhunga MLA-te pawhin thu an sawi.