Aizawl: Mizoram Pradesh Congress Committee (MPCC) President Lalsawta chuan, “Kan candidate-te sum hmanga inlei tlin tum lo turin kan thunun ang,” a ti.

Aizawl Press Club a chanchinbumite a kawmnaah MPCC President Lalsawta chuan, “Sum hmanga voter mipuite lei a, ram rorelna luah hi kan ram leh mipui tan ram tlukchhiat hlen theihna a nih avangin inthlana sum chakna hi Congress party chuan tihhlum (thah) kan tum a ni,” a ti a. Suma inlei tlingten ram rorelna an chelh chuan sum hmuhlet an tum bakah hausak an buaipui tih sawiin retheih huam minister/MLA neih a ngai tih a sawi.

MPCC president chuan ram mipuite hriat leh ngaimawh khawpa sawrkar khap smugling chu ram tlukchhiatna bul a ni tih sawiin an party chuan a do dawn tih a sawi a. “Kan sawrkar hrawn mekah inthlahrung tur zawkte an huaisen tlat hian dan kenkawhna in awmzia a nei lo tih a lantir a ni,” a ti. 

Congress party ngaih pawimawh hrang hrang sawiin sawrkar tha nei turin political will neia ram leh mipui tana tha an tihna tur daltu apiang chu suttlang zel an tum tih a sawi a. Restricted tender leh contract chhe lutuka thawhte tihbo an tum tih a sawi bawk a. Thalai leh lo neitu, kut hnathawk leh kawng hrang hrang eizawngte tan an mamawhna zawnah ‘Tang tanpuina’ buatsaih an tum tih sawiin Mizoram a lo changkan theih nan ‘That loh theih lohna bawm’ siam an tum tih a sawi.

Lalsawta chuan nakum 2023 MLA inthlanah Congress party in sawrkarna an chan a, amah chu chief minister a nih chuan chhan mumal taka hmingchhiatna nei MLA/Minister te chu a bân dawn tih sawiin, “Kan danglam ngam dawn a ni,” a ti bawk.

MPCC President Lalsawta hi MPCC vice president Lal Thanzara, Treasurer Zodintluanga leh MPCC MLA ten an tawiawm a ni.