Aizawl April 3, 2023 : Lunglei Municipal Council inthlan result puan a nih hnuah vawiin khan Lunglei Mizo Hnam Runah chhung inkhawm neih a ni a. He hunah hian MNF Adviser Lalruatkima chuan thusawiin, "MNF chuan kan chak lohna kan pawm a, insiam that nan kan hmang ang," a ti a. "Chakna chang ta ZPM te kan lawmpui a ni," a ti bawk.

Lalruatkima chuan, "Kan inenletna tur hmahruai a ni, tih hi kan hotuten an hria a. ngaihtuahna an hmang dawn a ni. Lunglei mipuiin duhthlanna thiang takin vote an thlak a. Result tha tak neitu ZPM-te MNF Party chuan kan lawmpui a, Lunglei hmasawnna atan theih tawp an chhuah ang, tih ka ring a. LMC member-te'n an mamawhte inthlahrung hauh lovin State sawrkar-ah rawn thlen zel turin kan chah duh a ni," a ti.

MNF Adviser chuan, "MNF sawrkar chuan Lunglei hmasawnna atan tawngka mai ni lo, a tak ngeiin kan rawn thawk zel dawn a ni," a ti a. "Campaign kharnaah khan ka sawi tawh a. Lunglei mipuite chungah thupha ka chawi nawn leh duh a. He sawrkar hian kawng hrang hrangin Lunglei mipuite rilru kan tinain an duhkhawp kan tling lo tih kan hria a. Ngaihtuahna thar nen hma thar kan la dawn a ni," a ti bawk.

"MNF party aiawha candidate zawng zawng te, inthlan buaipuitu official te leh democracy a nih anga vote thlaktu mipui zawng zawngte chungah lawmthu ka sawi a. MNF tana thahnem ngai taka thawktu unit, Block leh Sub Hqrs chungah lawmthu ka sawi tak meuh meuh a ni," a ti bawk.  

He inkhawmah hian Minister C Lalrinsanga Minister, Lawmawma Tochhawng MLA leh R Lalhnuna PAC member te'n thu an sawi bawk a ni.