Tunhnaiah Mizoram hmun hrang hrangah kangmei a chhuak vak a, Lunglei khua phei chu namenloin an buai a nih kha, hemi hnu hian hmun eng ngemaw zahah kangmei hi a la chhuak bawk a ni. Hetih lai hian kan lui tui hnar te chuan kiam lam a pan thu kan hre ve mek bawk a  ni.

Khuarel chhiatna kan tihah hian mihring hian mawh kan phur fo thin a, dan theih loh chu awm mahse heng chhiatna chhuak thenkhat hi mihring siamchawp a nihna lai a awm a. Khua a thal rei tawha  mihring fimkhur loh vangin kangmei nasa tak hi hmun then khatah chuan a chhuak niin a lang a.

Khawvel pum huapin kan chheh leh vel tih chhiat vanga sik leh sa inthlak danglam an sawi kan hre fo thin a, a nasa zel a ni tih pawh kan hai lo. Mizoram science & technology department pawhin sik leh sa inkar a hlat zel thu te, ruahtui a tlem zel bakah fur a tlai tial tial thu te an sawi tawh a ni. 

Khawpui tui chawmtu Reiek kaiah tui a kam mek a, kum tam tak a daih an ring tawh lo. Nitina tui awm zat mithiamte chhut danin tun leh tunah chuan khawpui a la chawm thei a. Khawl lam a that loh vanga pump thei lo an nih thute an sawi kha. A kam dan thlirin kum 4/5 hnuah pump tur a awm tawh lo mai ang tih te pawh an hlauh thu an sawi a ni. 

Tuna kan thil tawn te hi harsatna kan insiam chawp vanga keimahni vekin kan khum tak chu a ni ber a. Kan chheh leh vel kan suamsam nasat avang te, tawih ral thei tawh lo plastic kan sawngbawl zawh loh dan atang hian kan tawrh tur chu kan tuar a ni lawm ni? Kan thil tawn hian min ti harh sela, kan chenna khawvel lo hi a dang kan nei loa, kan enkawla kan duat a ngai a ni tih hi hriat thar a tul hle mai.    

Hetiang hi kan dinhmun a ni reng tawh a, engtin nge a ram pum ang hian hma kan lak ang, kan chheh leh vel, thing leh nungchate humhalh harhtharna a thlen theihna atana pen chhuak mek thalai te bakah dawhsan hran hran atangin tan lak thar a ngai hle mai.