ZALEN August ni 29, 2026 : MPCC Vice President Zodintluanga chuan vawiin khan Sihphir Group Congress Committee te tlawhin Political Trainning a neihpui. Political training hmanpuitu hian Chief Minister chu amah leh amah inhnial tawk a nih avangin midang debate puia cho lo turin a ti.

ZPM Sawrkar chungchang sawiin Zodintluanga chuan, thil ṭha zawng zawng min tiam a. CM chu Car man to ah a chuang ve dawn lo, Car pakhat bak a kawl dawn lo, Restricted Tender kan ti tawp ang tih leh thil tam takah an intiam a. Nimahsela, an han sorkar a, an intiamna tihhlawhtlin an la nei lo. Mipui an bum nasa a. An CM phei chuan vawiin ni thlengin dawt sawi ala ban san thei lova, amah leh amah a in hnial nasa hle.

CM Pu Lalduhoma'n tunhnai Assembly House Session neih zawh takah MNF te debate neihpuiah a cho a. CM Pu Lalduhoma hi amah leh amah a inhnial tawk viau a. Midang debate pui hi thil ṭul lo tak nia a hriat thu a sawi bawk a ni.

MPCC Vice President chuan, "Mi tam takin NLUP an sawichhe ṭhin a. Nimahsela, vawiin ni thleng a, NLUP avanga eizawnna mumal nei ta han hmuh hian a inchhir awm loh a, hmana rangva kan lo sem tawh, vawiin ni thlenga la hmang an awmte hian min tihlim. 1998 ah Tuirial Hydel Project nei turin bul kan ṭan a. Nimahsela, kan sawrkar alo tla a. MNF CM unauten Compensate an lak tam lutuk avangin Tuirial HEP chu a hlamzuih a. ZMC tia kan hriat lar tak Falkawn Hospital pawh a pawisa kan sawi chhuak vek a. MNF ten hna an thawk a. An sa pum thei lo. Ar vulhna atana hman a nih hnuah Congress sawrkar bawkin bul ṭan ṭha lehin Medical College hial kan lo nei ta a ni," a ti.

MPCC Vice President Zodintluanga chuan, BJP te hi India ramah hneh takin an sawrkar a, an la sawrkar lohna West Bengal ah te pawh hnehna an rawn chang chho zel a. Hetiang a nih chuan India ram inthlanpui, 2029 a neih turah India rama politic chinchang hriate chuan sawrkar leh ngei tur an ngai a ni. Nimahsela, hun a kal a, hmanni lawkah India ram ṭhalai nuai tam fete chu Jandar Mantar-ah pungkhawmin BJP te hi India ramah an hniam chak em em a. State hrang hrangah bye election neih niin BJP te chu an tla lamah an ṭang chho ta zel a. Hetih lai hian India ram ṭhalaite hian Rahul Gandhi chu Prime Minister cheibawlin an cheibawl ṭan tawh a ni, a ti.

Zodintluanga chuan, zankhat thil thuah politics hi a danglam thei. Chu chu India ramah pawh a chiang a ni. Tumah hian Mizoram-ah pawh keimahni thawh vang ni miah loin mipui rilruah Congress Party sawrkar tir duhna a lian sawt hle. A hunlai zelin Congress Party hi Zoram mipuite mamawh thlentu leh hmasawnna thlentu kan ni a. Mi tam takin Congress sawrkar hun an nghakhlel hle a ni, a ti.