ZALEN September ni 17, 2025 : Dampa bial by-election MNF official candidate Dr. R. Lalthangliana chuan vawiin khan W. Lungdar leh Khawrihnim-ah te hun a hmang a, Dampa bial chu Aspiration district huam chhung a nihna chhawr tangkai thiam a tul a ti a, thuneihna pek anih chuan tih tur a ngah hle tur thu a sawi.

Dr. R. Lalthangliana chuan, "India ramah District hnu fual bik Aspirational District (District khaichhuah ngai bik) 100 chuang zet zingah Mamit District hi kan tel ve hlauh a, hei hi thil zahthlak lam ni lovin, theihtawpa tan kan lak leh hmalakna tur a tamna lai a kawk zawk a ni. Kan hnu fualna lai tak hi kan chhawr tangkai a, kan hman thiam a tul zawk a, thuneihna pek kan nih chuan tih tur a tam hle dawn a ni," a ti.

MNF Senior Vice President Dr. R. Lalthangliana chuan Lalrintluanga Sailo-in a bial a hmangaih dan leh bial hmasawnna tura a thawhrimna te, a phak ang tawka bial mipui tan a rilru, tha leh zung, ngaihtuahna a sen dan zawng zawngte a hriatpui thu a sawi a. Rintluanga nen khan unau ang chiaha an inen thu leh chhungkua ang maia an khawsak thin thute a sawi a, Rintluanga hmabakte chhunzawm a, tih tur tam tak la awmte tih chhunzawm zel chu a ko-ah a innghat tih sawiin, chumi ti thei tur chuan Dampa bial mipui zawng zawngte khawngaih vote a dil a ni.

Former Health Minister hlui Dr.Thangtea hian tukin khan a hun laia sak zawh leh hman zui nghal Reiek PHC building chu a tlawh bawk.