Burma ram tualchhung buaina avangin kan unau Zohnahthlak thahnem tak chu an sahimna zawngin Mizoramah an rawn tlanlut a. Heng kan unau te hi Mizo mipuite chuan duat takin kan lo enkawl a, kan enkawlna avanga lawmthu sawina atan nimin maiah Chin TV chuan lawmthu sawina hun an buatsaih a ni.

Burma lama kan unau Zohnahthlak hnam hrang hrang Lai, Paite leh a dang te nen hian unau, chhut khat kual kan ni a. Mahse sawrkar hran hnuaia awm kan nih avangin duh angin kan inpawh thei lo a. Burma lamah lah nise sipai lamin hun tam zawk sawrkarna an chan avangin duh angin unau pawh kan inpawh thei lo a ni.

Mizoram buai 1966 khan Mizoram mi leh sa tam tak chu himna zawngin Burma ah an tlanchhia a, kan unau ten duat takin an lo enkawl a. Mi thahnem tak chu rawn let mahse engemaw zat chu Burma ah hian an inbengbel zui ta a ni.

Burma ramin democracy a hnaih chhoh hret hret laiin sipai lam chuan mipui kuta thuneihna hlan chu phal lovin mipui thlan sawrkar chu an paihthla a, anmahni chu lal ah an insiam ta a. Hei vang hian mi tam tak an sahimna zawngin Mizoramah an lo lut a, heng kan unau thlabara lo lut te lo tuamhlawm leh chhawmdal hi kan mawhphurhna a ni.

Burma buaina hi a ril a, reh mai chi niin a lang lo. Chuvangin he buaina hi a reh hma chuan kan unau mi thahnem tak te hi Mizoramah an awm chhunzawm a tul dawn a, mipuite pawhin dawhthei taka kan lo chhawmdawl zel a tul ang. Hetih karah raltlan te harsatna leh retheihna remchanga hmangin mi thenkhat chuan ruihhlo tawlhrukna atan an hmang tih hriat a ni a, hei hi a pawi hle a. Hun kal zel turah kan lungrualna tichhetu tur a ni.

Kan zohnahthlak unau ten an dikna leh chanvo an sualna kawngah hian theihtawpa lo tanpui zel hi kan tih tur a ni tih kan hriat thar leh a pawimawh a. Unau kan nihna chhawmnun zel hi kan tih tur a ni. Tuna kan unau ten harsatna an tawh hi kan in hmangaihna tizualtu leh tanrualna min siamtu ni ngei teh se.