- Dr. Zonunpari Hnamte Executive Committee Member, Indian Dental Association, Mizoram State Branch Mizote hi thil pawi a lo thlena mawhpuh tur zawng ruai chi hi kan ni ve a. Natna kan tawh chungchangah pawh a invenna lam aia nat tawh hnua mawhpuh tur zawn a awl khawp mai. Taksa hrisel leh fit tak neih ai chuan kan nuam tih zawnga nun hman theih hi kan thlahlel ber niin a lang. Hnuk hlat lam thil phei chu kan ngaihthah leh zual a. Mi tam takin zunthlum vei kan hlauhna chhante hi taksa hrisel loh kan hlauh tak tak vang ai chuan kan duh ang zawng zawng ei theih loh kan hlauh vang zawk hi a ni ang em aw a tih theih. Chutiang bawkin kan ka chhung leh ha kan han entir tawh hi chuan ka chhung hrisel kan neih duh vang ni lovin, kan ei leh in lama harsatna min siam avang te, na a awm tak avangte leh kan lan dan leh hmel a tihmawi loh vangte hi a ni tlangpui. Ha hrisel tha tak neih duh aia kuhva eipui theih loh ha neih hlau hi kan awm nual ang. Ha hi kan taksa peng dang ang lo takin a chhe tawh hi a rawn insiam tharin a inthawm tha chawp ve mai thei lo a, a chhe lai hi Doctor-ten an thawm that a, enkawl zui a, chhe thei tur lai ven reng hi a ngai a ni. Mi tam takina harsatna kan neih Doctor pan phah nana ho emaw, zahthlak emaw kan tih thin chu thaw rimchhia hi a ni. Thaw rimchhia hi a tam zawkah chuan ha raw (ha hni leh ha kara thil khawn lo bet thin hi) kan lo neih thin vang hi a ni a. Hei hi khawl hmangin awlsam takin ha Doctor-ten an tifai thei. Thaw rimchhia avanga inentir zah ai chuan kan bula miten thaw uih min tih hi a zahthlak zawk daih. Ha hi a nat tawh chuan a tlangpuiin a nget a lo thuk lutuk tawh vang a ni thin. Ha nget hi a thuk tawh chuan root canal treatment (RCT) a enkawl a ngai a. RCT hi a hautakin senso pawh a sang deuh tawh thin a. Ha nget tir tê, a thuk tak tak hmaa kan hnawh vat zel chuan na a tlem a, enkawl a awlsam a, senso a tlem bawk. A hun taka enkawl thei tur chuan a khât tawka kan ha check up thin a ngai a ni. Ram changkangah chuan ha lam sawiselna nei miah lo pawhin puitlingin kum tin an ha an check up thin a, naupangin thla 3 emaw, thla 6 dan zelah emaw an check-tir thin. Keini ramah thung chuan kan nula leh tlangvalten thil chhuak thar apiang neih ve zel an tum lai hian kan ha enkawl nan sum sen kan ui leh si. Cheng tam tak senga kuhva, meizial, sahdah etc hmanga kan ha kan lo tihbalh tawh tihfai nana sang chuang sen hi kan ui leh em em bawk si. Ha hian hmel a siam danglam thei em em bawk a. Mawi taka min nuihtir thei lotu chu kan ha pakhat lek lo awm pir bik emaw vang mai pawh a ni thei. Ha mawi lote hi siam mawi dan kawng a awm zel tawh a. Hakuh leh khabe dawh thleng hian a siam mawi theih a. Hakuh leh khabe dawhte hi ruhrel atanga siam dik tur chuan naupang kum9/kum10 atanga enkawl a tha a. Hetiang enkawl thiam bik specialist hi Mizoten 3 lai mai kan nei ve tawh a. Chutiag bawkin Mizo ha doctor zingah ka chhung leh khabe ruh zai lama specialist te, ha thawm that lama specialist te leh subject dang danga specialist-te pawh an awm ve ta nual mai. Thiamna a san rualin hmanrua tha leh changkang tak tak a chhuak reng bawk a; amaherawhchu, heng thiamnate chhawra hmang tangkai thei tur chuan a hun takah inenkawl a ngai si a. Chumi ti thei tur chuan keini mipui lam hian a tlai hmaa ha doctor-te kan pan zat zat thin a ngai a ni. Kan ha enkawl ngaite a tuah lutuk huna sum tam tak senga enkawl hun nghak kher lovin, a hun takah doctor-te i pan thin ang u. (Vawiin, March 6 hi World’s Dentist Day a ni a, hemi puala thu ziak hi a ni)