Mahmuka Chhakchhuak-

April 20, 2021 atanga kan in lockdown khan mipuia hri darh mek chu thunun theih phah kan beisei kha a ni a; amaherawhchu, kan beisei ang chu a lo ni hauh lo maiin May thla a rawn thlen chuan hri kai thar kan nei ta mawlh mawlhin, May thla pumah phei hi chuan CoviD positive 6,268 kan nei thar leh tho a, June thlaah ngei pawh chuan positive thar 8,093 kan nei bawk a nih kha. Jan atanga June thla chhung khan CoviD vanga nunna chân mi 85 kan nei bawk a. April thla chawhnu lam hian random test nei tura thuchhuah awmin Siaha leh Champhaiah chuan neih hman a ni a, Lunglei ah pawh nei tura ruahman a niin sorkar lam atanga nei lo tur hriattirna a rawn awm takah chuan an nei leh ta lo a. Mipui lam chuan lockdown hi ei leh bar zawnna kawngah min ti sukuk mah sela hri kai darh zel lohna tur leh sorkar lam atanga hmalakna a chak zawkna a nih dawn phawt chuan tiin sawiselna a awm lem lo viauin a hriat.

Amaherawhchu, May thla pum kan han in-lockdown-ah pawh chuan positive kan hmuh chhuah thar chu a tlem chuang hauh lo mai a, June thla kan chuankai hnuah pawh ni tin positive hmuh chhuah a la tlem thei meuh bawk si lo leh mipui hrek behna a rei tawh bawk si avang chuan mipui lam kan phunchiar tan ta viau mai a, June thla kan chuankai hnuah phei kha chuan Medical Operation Team-in kan economic ngaihtuahin lockdown hi thlahdul hret ni sela an ti ta hial a, chutih laiin MKHC lamin chief minister chu a office-ah kawmin tun dinhmunah hri vei zat an la tlakhniam theih chuan loh avang leh, mitthi an la pun zel avangin mipui kan him zawk nan a pangngaia inkharkhipna (lockdown) chu strict taka kalpui zel thaa hriain June 5, 2021 chuan CM chu an sawipui a. A hnu lawkah chuan sorkar lam atangin inkharkhip pawhseina thu chu a rawn chhuak a nih kha. 

Ni tam tak inkharkhip a nih pawh chuan awmzia a awm tak tak lo niin a lang a, June thla chhungah ngei pawh chuan CoviD vanga thihna a thleng mawlh mawlhin ni thum chiah CoviD vanga thihna report awm loh ni hi a awm a nih kha, a chang phei chuan ni khat thil thua Covid vanga thihna hi vawi ngai lai a thlen tumte a awm hial bawk a. Positive hmuh chhuah lah a tam thei riauin June thla pum puiah hian 8,093 lai hmuh chhuah a ni nghe nghe. Hetiang a nih avang hian inkharkhip hi sorkar hian test rûnpui neihna atan hmang se tia nawrna hi a lian hle mai a, June 24, 2021 ni-a Central YMA Committee Room-a Mizoram Kohhran Hruaitute Committee, political party-te ((BJP, INC, MNF, ZPM, PC, ZNP) leh NGO hrang hrangte Joint Meeting chuan, hripui leng mek do letna kawnga hmalakho dan tur chungchang sawihona an neihnaah ngei pawh sorkar hian chak zawkin  hri kai rang taka hriat chhuah zung zung a nih theih nan test chak taka kalpui ni rawh se tiin an rel hial a nih kha. 

Sorkar lam chuan July 17, 2021 atangin Chanmari West lamah Mass testing (test runpui) hi a nei tan a, July 20, 2021 ah pawh neih chhunzawm lehin hri kai pawh hmuhchhuah nual a ni nghe nghe a. July 19, 2021 nia meeting thuchhuak ang chuan July 20  atanga July 25  thlenga Mass testing hi nei tura ruahman a ni a, a lawmawm viau a ni. He Mass testing hian awmzia a awm phah viau niin hriat a, hei vang hian sorkar lamin July 31 thlengin inkharkhip a pawhsei leh pawh hi mipui lam chuan kan hrethiam viauin a lang. Pu Vana of LPS-in hri léng dona kawnga doctor rual inhlawm khawmna, Medical Operation Team (MoT)-a Chairman ni bawk Dr. ZR. Thiamsanga a kawmnaa MoT Chairman thusawi khan mi mak tih a hlawh viau a.  A tawngkam tak chuan, “Ramdom test kha a tha lutuk a, tam tak kan han hmuh chhuah phah a. Tunah ti ta vak ila, kan hmu teuh ang a, a dahna tur kan nei dawn si lo va, kha kha thil buaithlak deuh mai a ni. Khum hi kan nei tlem ropui si a, symptom an nei deuh zel mai bawk si a. Chuvang chuan random test chu ngai rih lovah kan ngai a ni,” tih a ni. Amaherawhchu, tuna hetia test rûnpui kan han neih leh takah hi chuan MoT Chairman thusawi hi kan theihnghilh mai ni loin hri kai hmuh chhuah tharte enkawlna hmun tur pawh mipui lamin kan ngaihven ta viau niin a lang a, thil lawmawm tak a ni. 
Hetianga inkharkhipna neih chhunga sorkarin hma a lak lai hian mipui lam chuan ei leh bar zawnna kawngah nasa takin hasatna kan lo tawk mek bawk tih hi hriat reng a tha bawk ang a. May 17, 2021nia Chief Minister’s Relief Fund hman dan tur ngaihtuahtu atana din Committee on Utilization of Chief Minister’s Relief Fund for Covid- 19-in Lockdown puan chhunga harsatna tawk, chhuanchhamte tanpui nan cheng Nuai sawmkua pakhat leh sing nga (91,50,000/-) semchhuah an rem tih a, Aizawl District chauh ni loa district hrang hranga chhuanchham chhungkaw pakhata Rs. 2,000/-a sem kha a lawmawm em em rualin  thil man a lo to ve zel bawk nen a beitham mah mahin a hriat a. Hei tunah inkharkhip pawhsei a niin, July 31, 2021 thleng chuan ni 102 vel lai kan han inkharkhip tihna a ni a, mi zawng zawng chu huap thei lo mah ila a bik takin kuthnathawka eizawnna lama thawk thei lo rei tawh lutuk leh ni tina eichawp zawngte tan hian ruahmanna siam a ngai tawh viau a ni. Chutiang ti loa sorkarin lockdown chhunga mipui retheihna ngaihtuahna a nei hauh lo a nih chuan kan MLA, BD. Chakma tawngkam anga ‘Mizoram to hold Guinness World Record for longest lockdown’ kan nihna hi rei tak mipuite hrek behna a ni zawk hial ang.  

Chu mai bakah Aizawl khawpui chhung chauha mass testing kan neih a, khawpui dang leh district danga nei chuang lo a kan inkharkhip reng tho chung si hi a sawt lo mai ni loin tangkaina awm lo a, inkharkhip rei tak hi mipui hreh behna ang chauh a ni thei a. Kan sorkar lam atang hian khawpui dangahte pawh mass testing hi ruahmanna a neih ngei a ngai a, a bik takin Lunglei khawpui phei chu a tul hle mai a, khawpui chhunga Chanmary, Venglai, Electric veng leh Venghlun mai bakah tuna positive 77 lai hmuh chhuah tawhna hmun - Dawn khua, in 100 vel lek awmnaahte hian a tul zual hle a ni.