Aizawl May 5, 2024: Vawiin khan ZPM General Headquarters Office-ah Party chhung inkhawm neih a ni a, thusawitu Adviser to Chief Minister TBC Lalvenchhunga, MLA chuan Budget vawi khat an pharh ve ta a, he budget hmang chho mektu mipuiten phun thawm an la hre lo a, fakna thawm hi ngaihthlak a nuam a ti. An khingpuiten thusawi lak kawih an thiam hle tih bak sawrkar puihna an nei lo niin a sawi.

TBC Lalvenchhunga chuan, “ZPM a sawrkar khan mipuite beiseina chanve tihhlawhtlin a niin ka hria a. Chief Minister huaisen kan nei a, opposition-te pawhin sawi nuam an ti a, Minister-te inpekna leh thawhrim zia hretute chu mipui kan ni. Eiruk loh kan intiam a, vawiin thlengin kan fihlim. Kan khingpuite hian kan thusawi lak kawih an thiam hle tih bak sawrkar han puihna em em an nei lem lo. Budget vawi khat kan pharh ve ta a, he budget hmang chho mektu mipuite phun thawm a la awm lo hi a lawmawm takzet a ni."

"Dawmkan ngai dawm kang lova, a kang sate nen hnungthak inhiahtawn hunlai a liam tawh a, tunah chuan kan tan tlan a, kan dik tlan a, a tha zawnga kan innawrtawn a ngai. Kalphung thar siam tur hian hna hautak thawh a ngai a, dikna hi a lal dawn a nih chuan kan Minister te an dik hmasak a ngai a, mipuiten kan thlawp a ngai bawk. Contract leh supply system fel lo lutukte kha a tuartu chu mipui kan ni a, tunah chuan dik leh felfai zawka kal kan tum dawn a ni,” a ti.

Adviser to CM chuan, “Sawrkar laipui atanga kan chanpual ve tur lokal tam takah fimkhur leh uluk, dik zawka kan kal a ngai a, tan pawh kan la reng a ni. State-in project priority mumal a neih a ngai a, hnathawh tur thawk zo si lova kalsan a tam avangin project tharin a tawrh phah mek a. Cheng vaibelchhe 5 chin project, term khat chhunga thawh zawh a awm mumal thin loh avangin hengte hi kan tawrh phah bawk a ni. Rs. 500 crore man Aizawl Smart City chu kum 10 chhungin an thawk zo hman lova, tunah fur a lo thleng a, Vanapa Hall kawtte chu tui a tling cham put reng a, he scheme lah hi a tawp daih tawh leh nghal a, hahthlak tak a ni."

"Thawkrim te chanvo hi khawiah mah a bo ngai lova. Dan hnuaiah dik takin a kal theih reng a, kawng dik kan zawhna tur daltu i ni lovang u. Dik lo min tih tir tumten min huat hi kan pawisa dawn lova, kan thil neih leh lakluh atangin kan eiruk leh ruk loh chu a chiang mai dawn a ni. Tunah hian Scooter loan ka lak bak thil thar neih ka la nei lova, dik duh chunga thahnem han ngaih tak tak chuan eirukna hian hmun a chang thei lo. He ram hi mimala hlawkpui tum lovin mipuiten engtin nge an hlawkpui ang a, hma kan sawn ang tih hi kan ngaihtuah ber tur a ni,” a ti bawk.