ZALEN October 9, 2025: Mizoram Tourism leh Ministry of Tourism tangkawp buatsaih Travel Fest 2025 ni hnihna chu vawiin khan Aijal Club-ah neih chhunzawm leh a ni a, hun hmanpuitu Chief Minister Lalduhoma chuan Mizoram-in a mikhual tam ber tur Vai te lo hlauh ngawt tur a ni lo a ti.

Chief Minister chuan, "Mizoramah Tourism Industry hi nasa takin a thang chho mek a, kum hmasa statistics atanga kan hmuh danin khualzin hi 139.50% laiin an pung a ni. Mi nuai nga leh singhnih chuang an rawn zin a, kan ram mipui zatve deuh thaw a ni. Rel lo lut hian nasa lehzualin a ti pung ngeiin a rinawm."

"Chuvang chuan mipuite hi mikhual nei thiam, hnam dangte khawsakpui thiam kan nih a ngai. Kan ramah hnam dangte ngaihngam takin an rawn zin thei tur a ni. Zo nun ze mawi, tlawmngaihna leh rinawmna, hawihhawmnate kan lo chawi nun thiam chuan sum leh paiah chauh hlawkpui lovin kan ram leh hnam hi a lo par vul tel dawn a ni."

"Mikhual lo kal tam ber turte hi Vai kan tih mai, kan Indian-puite an ni dawn a. Tumah hi lo hlauh ngawt tur an ni lo, lo hmuhsit tur pawh an ni hek lo. Dan ang taka rawn zin, an haw a huna haw ve leh mai tur an ni a. Kan rama sum leh pai an rawn thlauh kha kan tan a tha em em a ni."

"Hma kan sawn zel theih nana kan mamawh dik tak hriat zel a tul a, hmalakna tur dik takah zel kut hi thlak chat chat ila, kan resource neih ang angte hlawk takin kan hmang thei ang. Chumi atana tangkai Mizoram Travel Fest 2025 kan buatsaih hi a hlu a. A ngaihtuah chhuaktu kan Minister leh a thawhpuite chungah lawmthu ka sawi a ni," a ti.

Lalnghinglova Hmar, Tourism Minister chuan kal khawmte lawmna thu a sawi a, Tourism hmasawnna tura sorkar hmachhawpte a tarlang. Tourism department leh EF&CC te chuan Eco-Tourism kalpuina tur inremna (MoU) an ziak bawk.