Kumin kum tawp lamah MLA Constituency 40-a kan aiawha rorelna sanga thu tur mi kan thlang dawn chu a ni a, tun atang hauhin titi leng velah sawi a tam tan hle mai a, dinna bial tur an ngaihtuah mek ni pawha hriat a ni a, chutih laiin hmun thenkhatte chuan, ‘Kan khawchhuak ngei ni rawh se,’ an ti a, a then thung chuan Headquarter lam remruat apiang pawm an tum zawk nge ni thu leh hla an neih hriat a ni lem lo bawk a, party chhungkuaa thawkrim leh senior thenkhatte chuan an dinna tur bial an vil tawh bawkin a hriat a, a thente phei chuan sum leh pai pawh an seng nual tawhin a hriat bawk a ni. Chutih laiin a then an lo intilungawi lo bawka hriat a ni a, tunlai tak phei chu thu leh hla a tam viau hmel. Hetih lai hian M.Lalmanzuala chuan Independent-a din a tum thu a sawi tawh bawk a ni awm e. Kum 2013 inthlanpuiah khan mi 140-ten seat 40 inchuhin mi 100 chu hlawhchham a nih kha. Chutih laiin Pu Lal Thanhawla erawh chu hmun hnihah a tling thung a, a hnu lawkah a chhuahsan zawk, Hrangturzoah chuan Bye Election neih a ni a, mi pahnihten inchuhin INC Candidate Vanlalawmpuii Chawngthu a rawn tling a, chutiang bawkin North III-a Bye Election neih a nih khan mi 3-ten seat inchuhin a ngai bawk Lal Thanzara a tling nawn leh bawk a; tichuan, Indian National Congress chuan hneh takin seat 34 an la a, MNF-ten seat 5 lain MPC-in seat 1 an la bawk a ni. MLA nih hi a lehlam zawnga thlir chuan a hlawk bawk a nih a rinawm a, sum leh pai sen pawh an huam viau bawk niin a hriat a. Ka hriat mi pakhat phei chuan 2013 Election-ah khan Nuaih 70 a seng ngeiin a sawi a, rinthuin han sawi mai mai ila, he pa hi lo hlawhtlingin MLA lo ni ta sela, he a sum sen ral zawng zawng hi rawngbawlna anga ngaia hmuhlet leh pawh ngai lo tia a ngawih mai mai ka ring hauh lo mai a, hmuhlet leh ngei a tumin a aia tam zawk pawh hmuh let a tum ngei ka ring a ni. Dik takin ti ta sela, kum 5 chhunga a hlawh chuan a phak lo phawt a, kawng dang a zawn ngei chu a ngaih hmel a ni. Engtin nge chu lam chu keia hriat phak chi a ni tawh lo e. MLA-te hian fund an neih zah hi kum khat atan Rs 1,00,00,000 (Nuaih Za) a ni bawk a, kum nga atan chuan Rs. 5,00,00,000 (Nuaih Zanga)  tihna a ni. Hetiang a nih avang hian vanneih thilthua MLA ve hlauh theih chu chakawm tak tur chu a ni. Kum 2013 MLA inthlan kha MPF lamten hma la viau mah sela hmun thenkhatah chuan awmzia teh vak a nei lo niin a hriat a, Kohhran Upate meuh pawh pawisa vangin an buai viau a ni awm e. Kan Kristianna hian hmun a chang tam vak lo pawh a ni awm a, hetiang bawk hi kuminah hian kan tawng leh ang em tih chu zawhna lian tak a nih rualin tun atanga thenkhatte chet dan en hi chuan a ni leh ngei turah pawh a ngaih theih mai nghal bawk a, a huphurhawm nghal ngawt mai. Sorkarna vawng chelhtu Congress lah chuan an MLA bial pakhat atan nuaih 400 an ruahman nia hriat a ni lehnghal a, hei hi a hming atan chuan NLUP an ti a. Han ngaihtuah mai pawhin MLA bial 34 an nei a, nuaih 400 a puntir chuan Rs. 1,36,00,00,000 lai a ni a, tam tham tak a ni.