ZALEN December 12, 2025: MNF Vice President & LoP Lalchhandama Ralte chuan vawiin khan Mizo Hnam Run-ah thu a sawi a, Dampa leh Lai Autonomous District Council inthlana MNF party thawhhona tha leh result lawmawm an nei chuan an sawrkar leh dawn tih a tichiang hle, a ti.

“Dampa by election-a kan tanrual ang bawkin, LADC inthlanpui hmachhawn nan kan thawhhona a tha a. Kan thawhlawm tlingkhawm pawhin inthlan senso a daih vek a. Hei hi kan tanrualzia a tichiang bawk, a ti.

MNF Vice President chuan Lawngtlai District bialtu a nih angin LADC inthlan chungchang a sawi a, “LADC inthlana (MNF 8 MDC) result duhawm tak kan nei hi MLA 2028 general election-a kan chakna tur hlimthla a nih avangin kan party thawhhona zawng zawngah lawmthu ka sawi a ni,” a ti.

Lawngtlai District MNF hotuten Seat 20 chuh tura rawtna an rawn siam dan leh, a bak seat 5 pawh an ruahmanna ang zela kal an nih thu a sawi a, “Hqrs-a kan hotute remtihnain a ground-a awmten MNF tana tha zawk tur nia an hriat angin kan kal,” a ti.

LADC result leh a nghawng sawiin, “MNF sawrkar laiin LADC MDC Seat 25 awmah kum 2020 khan Seat 20 kan la a. Vawiina ZPM sawrkarah ZPM chuan Seat 6 chauh an la a, pathumna an ni. Hei hian ZPM chu mipuiten an hnawl mek tih chiang takin a lang a ni,” a ti.

LADC sawrkar liamta chungchangah a tirah MNF khan Seat 20 nei mah se, a hnuah MDC 9-ten ZPM an zawm avangin sawrkar a inthlak chho ta chhen a, thil pawi tak a nih thu leh, tun tumah chuan tute pawh sawrkar se, sawrkar ngelnghet a awm theih nan MNF chuan manifesto tha tak kan siam a. NGO-te pawhin theihtawp an chhuah avangin an politics boruak pawh a danglam ta viau a ni, a ti bawk.

Chhantea chuan: “Tun inthlanah sawrkarna siam thei party mal kan awm loh avangin lu a hai hle a. Seat la tam ber kan nih angin MNF kaihhruai sawrkar siampui turin INC kan indawr nghal a, ngaih tha taka kan awm laiin, a tuk lawkah INC leh ZPM an lo indawr reng avangin kan thawhhona an titawp a. INC nen kan thawhhona tihtawp chhan nia min puhnaah MNF party aiawha thutawp siam theitute kan tel ve lo.

“MNF party hotute chuan lungrual takin, tun dinhmunah chuan opposition-ah i awm ang u, kan ti a. INC leh ZPM-ten sawrkar an siam mai turah kan ngai ta a. Amaherawhchu, tunah hian ZPM PAC lamin INC leh ZPM sawrkar siam an remti lo tih thu kan hriat leh zel avangin sawrkarna siamtu tur thu chiang a awm rih lo.”

“Kan politics vir vel thlirin Dampa-ah mipuiin ZPM an hnawl a, LADC-ah pawh kum hnih chauha upa sawrkar an hnawl leh a. Arsi a eng mek tih a lang. Inthlan lo awm leh turah MNF kan sawrkar dawn tih chiang takin a lang. Thenkhatin tawlailir leh sakawrte an ring a, keini chuan kan Pathian hming kan lawm zawk ang a, hnehna kan chang zel dawn," tiin party mipuite lungrual taka awm turin a fuih a ni.