Article

Kan ram politics siam that hi Ka kutah

Admin - Mar 15, 2021

Kan ram politics siam that hi Ka kutah

- J.Lalngilneia Pu

    Pathian min ven vangin kum 80 ka liam ta. Engmah tih theih nei lo mah ila, hnam rilru pu takin kan ram hi ka ngaihtuah ve thin a. A tir deuh hlek atangin:

    British Crown Colony-a independent-a awm thei ni siin milem be sorkarah kan lut a; Autonomouse District Council min pe a, chuta tangin Union Territory (UT)-ah hlan kaiin kan awm a. UT kan nih laiin kan ram hruaituten (Congress) Chakma Autonomouse District Council pek an remti a. Kan hnam tan hling lian tak an ni ta foin ka hri a, an la ni zel ang tih ka hlau hle a ni.

    He party hian, kan ramin state puitling a nih hnu pawh a, kum 20 chuang zet ro an rel chhung khan, buh bala kan intodelhna tur leh power-a kan intodelhna tur lama hma an lo la lo kha, an zu zawrh nen a engnge pawi zawk ang tih ka ngaihtuah ve fo thin. Anmahni mi mal mihring tha tak tak awm mah se, he party hi chu kan ram tan ka hmu tling ta lo deuh fo thin. Kan ram tan an sulhnu a tha vak loin ka hria.

    Tuna kan rama rorel mektu ruling party MNF-te hi kan han thlir ve leh a. State puitling kan nihna pawh kum 34 lai a liam ta. Kum 15 vel lai kan rama rorelna an chan hun hian, international politics hial lo khel tawh ni si, buh leh bala intodelhna lamah hmalakna chang an hre lo va, kan hotupa berin, kum 2020-a hripui avanga harsatna khawvelin kan tawh khan, intodelh pawimawhzia a hriat thu a sawi chhuak ta chauh mai kha a ni a. Kan rama rorelna chang tawhtute hian intodelhna lamah khua min titlai ta vekin ka hria a; mipui hian a ngaihna hria roreltu thar nei thei ila, ram chuan a mamawh hle tih a lang.

    Ka thlir danah tuna MNF-te hi chuan, Pu Laldenga hruai MNF kha kan ram tana huaisenah an tluk ta lo hlein ka hre bawk. India Union hnuaia MNF an nih tak vang pawh a ni mai thei. Assam nena ramri buaiah buai zual laiin ramri vengtute a tlawh ngam lo va, Assam dem zawnga thu a sawi ngam lo khan, BJP hnuaiah dawlzawrin a zawr emaw ka lo ti hman deuh a.

    Tin, MNF leh India-in inremna an neih hlima, Pu Laldenga’n remna hnuaia hma lak dan tur, Lammualah leh Vanapa Hall-a a thusawite kha tuna MNF hian sawi zui leh bawhzui a nei lote hi mak ka lo ti viau bawk.

    Kan ram mipui hi politic-ah rilru thar pu thei ila. Thil hi zau zawk leh kim zawka ngaihtuahna kan neih a hun hle. State puitling kan nihna pawh kum 34 a liam mek laia kan thlen chin thlir ila. Party pahnih sorkarna hnuaiah hei chen hi kan awm tawh a, kan thlen chin chu heti zawng hi a ni e. Dawt leh thawnthu hluia inawih lunglentir mai mai nan i inphal tawh lo vang u.

    Serchhip bial MLA by-election neih turah pawh political party tinten a mi mal thu-ah chuan candidate tha tak tak vek an dah hlawm a. Candidate-te an mi mal nihna ai mahin he party hian ram tan engnge min tumpui tawh a, min tumpui dawn tih ngaihtuah tel ila. Rilru nghet tak i insiam ang u. He mite thufing hi i hre reng ang u.

    Rev. Lalsawma (L) khan, “Kan ze nghet tak chu kan ngheh lohna hi a ni,” a ti a.

    Rev.C.Thansiama khan, “Kan pawn lan hi thuk tak a ni,” a ti bawk. He mite thufing atang hian, Mizote i thangharh ang u. Kan ramri venghim ngam party awm thei se ka duh ber. Congress sorkar lai khan ramri buaiah MZP leh journalist-te thisen a chhuak a, MNF sorkar laiin ram leilung faten an tuar leh, khatiang kha thleng nawn tawh lo se ka duh thu ka sawi a ni e.