MLA inthlannpui meuh zawng party worker thenkhat leh politics tuipui zual tan chuan Masi Pate a a ni hrim mai a. Social Media an tih Whatsapp, Facebook etc. leh nitin chanchinbua kan hriat tlanglawn chin ngawt pawh hi Kristian rama kan campaign dan atan chuan chhuanawm loh a va tam em! Whatsapp-ah hian kan party tan lam tina fe fe kan kat nut mai a. Cartoon lamah te thlengin CM ni mai thei awmte kan ziah duh dante hi kan fate tan entawn tlak loh tur a tam hle. Mi thenkhatin MNF beih nan taka article hmanga BJP nena sawi zawm luih tlatte hian awmzia thui tak neiin a lang lo. Thenkhat chuan NEDA-te hi an policy sawi hman lek lovin an sawi a. BJP hi kan duh lo tak tak a nih chuan CADC-ah Congress nen an thawkho mek a, ZPM CM candidate pawhin ihe lovin kum 2015 Bye Election-ah khan a thawhpui a. Aizawl khawpui enkawl tur pawhin  BJP a lo thawhpui thlap tawh a. Hengte hi sawi nawn fo pawh a tul tawhin a lang lo. Pu Duhoma’n  Pawl 8 a pass tawh han tih ang chi te, Vice President a nei tam ber tawh han tih ang chite hi tun inthlana amah beih nana tangkai ber a ni lo maithei. Chutiangin Pu Zoramthanga mau lian chi tihte leh Bulldozer te chi han tihte hian MNF beihna atan kori a tu vakin a rinawm loh. Pu Hawla’n Hnahthial District a tiam a, kum 10 chhunga a tipuitling leh ta si lote, Rahula’n Saitual district a tiama, a pawlte ngei an sawrkara an tihpuitling leh duh si lote hi chu Hnahthial leh Saitual Bial mipui tan chuan Congress vote lohna thlamah lo ngaihsak ta pawh ni ila, bial dangah kori a tu vak lo thei. Heng Vanglaini November thlaa ni 15 lai mai MNF leh BJP sawifin talh tumna lo chhuak thin pawh hi, Party ruihchilh lo ho tan chuan kori a tu leh chuang lo mai thei a; kan hriat thiam tur chu Vanglaini Editor hi a in-candidate miau a, a elpui ber MNF leh a hotupa sawi hnawmna te chu  a chanchinbuah a lo chhuah tam deuh a nih pawhiin kei ka hrethiam asin, kei ka chanchinbu ni se inthlan campaign lai na na na chuan ka elpui ber beihna te chu ani ai hian ka chhuah nasa daihin ka ring. A chanchinbu a ni miau alawm. Heng: (1) Kawng chhhe lutukte; (2) Zu vanga kan khawtlang nun chhe chak lutuk te; (3) Corruption nasa lutuk te; (4) Sikul kai hun tihdanglam te; (5) Sawrkar hnathawk lo tana Health Care Scheme chhe lutuk te; (6) Road Tax kum 15 lak lawk te; (7) Aided HS/HSS dinhmun chhe lutuk te; (8) Aizawl khawpui chhunga rotling thawh hmuh tur awm lova lei dawh chim thin te; (9) MLA/Minister te in kum 5 chhunga ropui chak lutuk te; (10) Eirawngbawlna Gas harsa lutuk reng mai te; (11) Private buhfai lei kaltlanga buhfai chhia sem ang chi te; (12) Chhim lam hmasawnna tur Lunglei High Powered Committee sum Rs. Nuai 400 vel zet bo thlau ang chi te; (13) Zophai MZP hnatlang tur kan sawrkarin Assam Police laka a hum ngam lova mi 49 laiin silaia kah hliam an tawhna chhante leh thil dangte kha sawrkar paihthlakna khawpah kan ngai hlawm lo nge tihte ngaihtuah tham a ni. Zu, kawng chhia leh corruption; hemi pathumte avang  pawh hi sawrkar thlakna khawp chu a ni. Chuti chungin kan thlak mai thei a, kan thlak lo mai thei. Mipuite mawh a ni mai. ZPM hi ka ui: Hmeichhe thudawnin ZPM hi kum 2015 ah khan din ni tawh sela, a dintu pawh khaw tin atangin palai ko sela, Congress ni lo MNF ni lo hemite thlak thei tur party thar mipuiin din kan duh em ti sela, Palaiin an duh chuan din sela, heng MPC, ZNP leh PRISM te hi thiat vek sela tun ai hian an boruak chu khitah a ni ang. Kha kha an ti ta si lo va, nikum Sept.-ah an din chauh a ni a. Chu lah party an inthiat ngam meuh si lo. Khawvela hlawhtlinna tam ber hi thawhrimna (hard earned) rah a ni. Politics-ah a ni lehzual. Chuvangin ZPM hi an tha lo an ti lo, an din tlai lutuk a, an sawrkar zo em lovang tih hi mi tam tak ngaih dan niin a lang. Vote hrim hrim chu an hmu tam ve viau ang a, MLA erawh chu pathum an nei ang em tih a ni. Result a lo chhuah meuh chuan, “Kan lo che tlai deuh a ni,” an la ti ngei ang. Tichuan, Congress hi an zu zawrhte, kawng chhiate, eiruknate kan ngaimawh loh chuan an sawrkar leh mai ang a. Mipui titi leh tlangkama rorel lai an nin dan hi vote-a lantir erawh chuan Seat 7-10 bak an la tawh lo mai thei a ni. Tuin nge kan thlak tak ang? Tun hmaa kan kal dan bawk kha a la nih ka ring. Ruling party kan thlak dawn chuan a thlak theitu party lianah mipui an thle leh dual mai thin. Tuna a lan dan chuan a thlak theitu tur chu MNF a ni leh mai a. A sawrkar tur chu a malin an sawrkar leh mai ang. Thilmak tak chu, Congress MLA/Minister leh worker langsar tak tak an bang a, ZPM an zawm hauh lo hi a ni. An tha emaw tha lo emaw MNF ah deuh vek an lut a. Tin VC term hi kum 1 zet a la awm a, heti chung hian ruling VC hi 50 lai an bang a, MNF VC an siam hi a mak ngawt mai. ZPM-ah te inleh ve awm. Kei chuan ka hre tlem a. ZPM VC-a inlet ta hi pahnih pawh ka hre lo. Thilmak dang leh chu party lian Congress-te hian insiamthat an tum der lo hi a ni.Tin, MNF hruaitute pawh hian ZPM kalphung thar sawi hi, “Kan SEDP-ah hian a awm vek alawm, a hrang a hraia beih a ngai lo,” tih nachang an hre der lo. Thilmak pathumna chu Pu Duhoma’n Serchhip-a campaign a han hawn tum khan MNF leh NEDA kha an han sawi vak a. Kum 3 che che kal ta Bye Election-a BJP a thawhpui leh Aizawl khawpui enkawl tura BJP a thawhpuite leh BJP hruaitu an party office-a Tawhlloh Puan an lo bahtir te kha miin amah beih let nan an hmang ang tih kha a ngaihtuah thleng lo em ni ang? A voice record-te kan ngaihthlak phei chuan BJP thawhpui a hreh lohzia a lang chiang em em a, tuna taka MNF leh BJP rem leh rem lova sawi pawlh talh han tum leh si te hi a ni sawi atan chuan a iaiawm ngawt nia. Zosiama Pachuau kha a fing viau mai. “MLA tlin a har, Minister nih a har leh hret, CM nih phei chu har tak a ni. Chuvangin, kum 10 CM ni thei Zoramthanga hi ka hmu hniam miah lo,” a ti daih. Mi thenkhat party leader te pawh an ni. Pu Zoramthanga fiamthu thawh nan lek leka an hmangte hi an hlawkpui ka ring lo. A sawisatute hian CM nih an la hlat riau. Englekhawle, kan campaign vel dan luai luai thu tam tak hi chu Kristian rama awm dan atan chuan a duhawm lo hle mai. Policy han sawi pap pap aiin a lian a tein midang beihna kan uar mah mah. Mimal dik lohna famkim lohna lai kan sawi tui lutuk hi chu thenkhat tan chuan a khamawm ngawt ang. Inthlan puan hnua campaign boruak en hian sawrkar hi kan thlak hmel a, a thlaktu tur pawh a tinzawn theih deuh mai. Kar leh atang chuan pathumna tur hi an hniam sat sat ang a, mipui an inher rem leh thup mai ang. Number game a nia, tam a ngai. Mak ka tih leh em em chu kan ram mipui hian, thalaite ngei pawh hian Hnam rilru kan ti a, a phawvuakah chuan kan au nasa hle. Chutih laiin UNO-in zalenna dar a vuak (UNO Thupuan 13.9.2007) kan ngaihsak leh der si lo hi a ni. He thupuan avang hian ram 17-in silaia kah ngai hauh lovin Independent an hmu dawn a. He thupuan hi min awptu India ngei pawhin a tha tiin ban a phar thlap a. Mizoram rorelna sang ber pawhin 2015, Dec thla khan hemi atana hma lak tur chu an passed tawh a. Bawhzuina erawh chu pakhatmah a awm lo. MNF-in manifesto bulpuiah an dah a, chu pawh a hotuten an sawi tam lo kher mai. India hnuaia state budget insem chhawk thlahlel tawk kan tam lutuk a, thalaite hlei hlei hi an nikhua teh chiam lo. Sum kan duh si, ruihhlo ah kan thalai tam tak an tal buai. AIDS vei, corruption ngawl vei kan tam. India hnuaia kum 70 kan awm hi khawvel ngaihin a chhuanawm loh khawp mai. Tunah hian kan tana tha ber chu Independent a ni a, a dawttu chu Protectorate State-a awm a ni. Hnamah kan harh kan tih pawh hi International level-ah chuan la harh lo tak kan ni. India hnuaia State zia zang deuh tih mai mai a ni kan thlakhlelh. A hniam em mai.