Aizawl; Mizoram Pradesh Congress Committee (MPCC) president Lalsawta’n Pathian leh Mizoram mipui zara an sawrkar chuan, hlawh, pension leh GP fund te sawrkar hnathawkten a hun takah an hmu thei dawn tih a sawi. “Sawrkar hnathawkte hlawh leh a dang hlawkpuitute chu sumdawng, mipui nawlpui leh kohhran thlengin a ni,” a ti.

Nimina Aizawl Press Club-a thuthar thehdarhtute a kawmnaah Lalsawta chuan Congress a sawrkar laiin sawrkar hnathawkte duhsakin an hlawh chungchangah 6th pay commission recommendation chu ‘adapt’ mai lovin, a nih ang angin an pawm tih a sawi.

“Kum khat a vawi hnih an Dearness Allowance (DA) pung pawh 16.8.2018-a notification kan chhuah angin sawrkar remchan dan angin kan pe a, Pathian leh Mizoram mipui zara kan sawrkar chuan kan chhunzawm leh ang,” a ti  bawk.

Central sawrkarin 1.7.2022-ah 38% DA a pek laiin Mizoramah 1.3.2022-ah 28% pek an nih thu te, an sawrkar chuan kum tam tak Mizoram a lo hman tawh Old Pension Scheme chu hman leh an tum thu leh pensioner-te tan pawh Dearness Pay (DP) a hun taka an pek tur thu a sawi.

Ministry remruatna hnuaia a taka sawrkar mawhphurhna hlen chhuaktu chu sawrkar hnathawkte an ni tih sawi bawkin, Lalsawta chuan, regular leh provisional employee-te tangkai zawka hman dan ngaihtuah a, an dinhmun ennawna Manpower Policy leh Manpower Management mumal tak siam an duh tih a sawi.

“Sawrkar leiba a tam em avangin sawrkar lo piang leh tur tan rulh ngai tur a tam dawn,” ti bawkin, sawrkar sum a nih anga dik taka hman loh vang leh Planning Commission awm tak loh hnua India ram sum enkawl dan danglam ta hriat fuh loh vang nia a hriat thu a sawi bawk.

Lunglei Municipal Council inthlan lo awm tur behchhana bial lo vil turin Lunglei West - PC. Lalthanliana, Lunglei South - Dr. RK. Lallianthanga leh Lunglei East- Joseph Lalhimpuia te ruat an nih thu a puang bawk.

Congress president-in eng nge a sawi?

Sawrkar sum hi mi mal sum enkawl anga enkawl theih a ni.

Party thenkhat ten kumin inthlan hi an sum ringa chak theih an inring.
    
Mipuiten candidate-te sum an hnawl ngam chuan kan ramah rorelna tha nei turin a bul kan tanah kan ngai.

Mizoram mipui leh a bikin, Congress party mite chu kan candidate te phurit siamsak lova sum hman loh theih lohnaah pawh kan block leh Unit zawng zawngten lo inhuam turin leh a tul anga lo luang chhuak zawk turin kan inngen.

Ram rorelna tha nei turin a man kan pek ve a ngai a, chu chu Mizoram mipui hian kan huam ve tur a ni.