ZALEN November 27, 2025: MNF Treasurer Lalruatkima chuan vawiin khan LADC huamchhunga khua - Lungtian, Rawlbuk, Bualpui NG, Siachangkawn leh Lungzarhtumah te hun a hmang a. heng khuaa thu a sawi naah sawrkar chu ICU-ah a awm a ni ber. An thaw tawk tawk, an nung tawk tawk a ni ber e, a ti.

Ruatkima chuan heng khuaah hian thusawiin, "ZPM party hi Dampa by election-ah an in set hlum tawh a, LADC-ah an inset hlum leh a ni. Lawngtlai bialtu ZPM MLA duh loh danin candidate set a ni a, Adviser to CM atang pawhin ban a tum phah hial a ni. Bial tin deuh thawah an in set hlum a, ZPM bial tin deuh thawah an in indinthuah a ni. LADC area-ah ZPM atangin an bang chhum chhum a, ZPM bansan chu a trending hle a ni," a ti.

MNF Treasurer chuan, "ZPM party-te hian Dampa biala an zawrh angin hna te, therhlo hrang hrang an rawn zuar leh mek a. Lo awih reng reng suh u. A hmu tur hresain resticted tender hmangin an duh zawng hna an pe fel vek tawh," a ti a. "ZPM hian AR Biak In neih sak an tum a, an hlawhchham a, tunah chuan induhsak bikna hmanga an sum tuakin Party office tur an lei fel tawh. ZPM party leh an mite an thau tulh tulh a, mipuite erawh chu kan cher tual tual thung a ni," a ti bawk.

"Chhiah kan tipung ve lovang an ti a, chhiah hrang hrang an ti pung thur thur a. GST a tlahniam zel angin ZPM sorkar a tlahniam zel a ni. Buhfai man a letin a pung a, electric bill a pung a, kan sawrkar hi ICU-ah a awm a ni ber. An thaw tawk tawk, an nung tawk tawk a ni ber e," a ti.

Lalruatkima chuan, "Leiba a pung a, hmasawnna hna thawh mumal an nei lo a, phai lama hotu lian dawra kal ngam an awm mang lo a. An rorelna reng rengte hi chhuanmang rorel a ni, a buai nuai tawh mai a ni," a ti bawk.