Aizawl February 10, 2023: ZPM Friday Political Session chu vawiin khan neih leh a ni a, he huna thusawitu ZPM PAC member TBC Lalvenchhunga chuan sawrkar kaldan chu Crony capitalism an tih fo ang hi niin a sawi.

TBC Lalvenchhunga chuan, “Kan sawrkar kal dan hi Crony capitalism an tih fo, mi tlemte induhsakna ang chiah hi a ni. India ram pawh Modi leh Adani te induhsakna avangin kan buai mek. Chutiang chiah chu tun dinhmunah Mizoram hian kan tawk mek niin a lang.  Hei mai hi a ni lo, Roman circus an ti a, Rome hunlaia emperor ten khua leh tui te rilru pawhpen nan hlimhlawp leh intihhlimna siama mipui leh rethei te an bum ang khan, tun dinhmunah hian hlimhlawp leh infiamna chu hmanruaa hmangin retheite leh mipuite min bawl ni berin a lang. Department danga ram hmasawnna tur sum leh pai awm lo khawpin Sports department hi vulh mek a ni a, heti ringawt chuan Rome lalram rorelna tluchhia ang kha kan hmabak a ni awm e,” a ti a.

ZPM PAC member chuan, “Mizoram State Sports Council (MSSC) hnuaiah Vbc 554.04 hmangin hna thawh mek a ni a, UD&PA atangin Vbc 31 leh Aizawl Smart City Ltd. hnuaiah Sports atan Vbc 98 an hmang bawk a, a vaiin Vbc 683 zet Sports Infrastructure atan hman a ni a. Heti zat hi PWD, Electric leh PHE Department te belhkhawmin hnathawhna tur an nei lo. SASCE atangin Vbc 37 hman mêk a ni a, REC atangin CSR kaltlangin Motor Race Track siamnan Vbc 7.5 ruahman a ni a, kan sawrkar hian Vbc 8 an tum dawn bawk a ni. Kum 2019 atanga tun thlenga Agri & Allied sector-a sum dah let thum vel leh, Power atana sum dah let hnih chuang Sports atan hian hman a ni tihna a ni,” a ti.

TBC Lalvenchhunga chuan, “Kan ram mipui te hian khuarel nena inbuktawk hmasawnna ruhrel tha zawk te, ei leh bar zawnna ngelnghet zawk te, mipui nawlpui mamawh hnianghar zawk te hi an phu a; chutiang pawh beisei thei lo leh beisei ngam lova hruai kan ni mek. Emperor Nero hunlai ang mai khan khawpui hi hal a, a sir atanga thiam hla chhama thlir reng hi pawi an ti miah lo tih a lang reng a ni. Chumi ti tawp a, kalphung thara mipui rorelna tak tak, mipui sawrkarna din turin ka sawm che u a ni,” a ti bawk.