ZALEN July 16, 2026: MSU General Headquarters chuan vawiin khan Under Graduate Mizo Topper mi-24 te lawmpuina Woodland Hills Auditorium, Zonuam ah an hmang. Zirlai an lawmpuite hi subject toppers Mizo 24 leh SU leaders 2 niin pawisa fai leh citation hlan an ni. He huna khuallian Art & Culture Minister C. Lalsawivunga chuan a eiruk loh thu zirlaite hmaah a sawi. 

C Lalsawivunga Khuallian chuan zirlai an lawmpuite chu taimakna, tumruhna leh tih tak takna an neih avanga hlawhtling an nih thu leh chhawr tlak ni turin a fuih. Mizo thalai te All India Sevice ah lut an tam tawk lo chu tan lak a ngaih thu leh UPSC-ah theihtawpa beih bakah SSC ngaihven thar a, mizo thalai a tam zawk luh tul a tih thu a sawi. 

Mahni hmasialna, duhawmna, hlemhletna, eirukna hian mizo nun a tih chhiat thu sawiin “Kan Chief Minister kaihhruaina hnuiah, he sawrkarah, a fawng vuantu te hi eirukna lakah hian kan la fihlim niin ka hria, ka lawm hle a ni. Kei pawhin ka eiru lo,” tiin ram siamtha tur hian mitin te an pawimawh a, kawng kawhhmuh theitu Pathian hre rengin Ani-in kawng chu min kawhhmuh zel ang a ti.

MSU President B.Lalkhawngaihzuala chuan overall gold medalist panga (5) zingah Mizo pali (4) lawmpui tur an nei chu lawmawm a tih thu sawiin, ram leh hnam hmangaih turin Zirlaite chu a fuih a, ram leh hnam hmangaih lo Officer leh Politician te chu ram leh hnam tan an hnawksak thu a sawi a. Aia upa te zahthiam a, zirthiamna in zonun zemawi hliahkhuh lo se, nakin thlenga lawmpui zel tlak mi hlawhtling a inchherchhuak turin Zirlai passed lawmpuite a fuih bawk a ni.

Lawmpuina hun hi Roluahpuia Vice President chuan Chairman niin a kaihruai a, Dr. H Laldinmawia, Adviser MSU chuan hunserh hmangin Zodinsanga General Secretary chuan report a pe a ni.