DOWNLOAD OUR APP

Read latest news on your phone
app-store
Kan term hmasa chhyungin nasa takin Mizoramah hmasawnna a thleng - Shah
Oct 06, 2019

Aizawl: Union Home Minister Amit Shah chuan nimin khan langin Aizawl a rawn tlawh a, mi pawimawh hrang hrang te a kawm bakah Govt. Mizo High School field-ah North Eastern Council (NEC) bultuma Commerce & Industries department, Mizoram ten an buatsaih, North East Handloom and Handicrafts Exhibition a hawng a, he hunah hian an sawrkar hmasa chhungin Mizoramin hmasawnna rahbi thar tam tak a nei niin a sawi.

Exhibition hawnnaah hian Union Home Minister Amit Shah chuan India state-te zinga state nuam leh mawi bera an sawi Mizoram chu nuam a tih thu sawiin, “Mizoram chuan India democracy-ah dinhmun sang tak a chang a, tun hmain Mizoram chu ram buai leh tharum thawhna hmun a ni thin a, mahse tunah chuan chung hun khirh leh hrehawm te chu kalsan tawhin ram ralmuang tak a ni tawh a, India ram mai ni lo, khawvel thleng pawhin muanna leh inunauna puang chhuaktu leh hmeichher chhi tu, ti a hriat lar a lo ni ta a ni,” a ti. Home Minister chuan, “Handloom leh handicrafts hmangin Mizoram mai ni lo hmarchhak pumah nasa takin eizawnna kawng thar a inhawn belh thei a, hei hian mipui te anmahni kut leh kea ding turin a puih thei dawn a, hengte hian hmasawn turin theihna sang tak leh hmabak êng tak a nei a ni,” a ti bawk.

Union Home Minister chuan Prime Minister Modi-a kaihhruaina hnuai-ah India hmarchhak chuan chak takin hmasawnna leh remna kawng a zawh tih sawiin an term hmasa kum 5 chhungin nasa takin Mizoramah hmasawnna a thleng tiin chung zingah chuan MW 60 pechhuak thei Tuirial Hydel Project te, Bairabi rel kawng lian nena thlunzawm te, kilometre 158-a thui Kaladan Multi Modal Project te, Myanmar ramri dep khua Hnahlan, Vaphai, Zote leh hmun danga Border Haat siam te, cheng vaibelchhe 51 senga sak Sainik School te leh project dangte a tarlang. Home Minister chuan an sawrkar leh Congress kaihhruai sawrkar a tehkhin naah, 13th Finance Commission-in Mizoram tan cheng vaibelchhe 19,974 a pek laiin an sawrkar hnua din 14th Finance Commission chuan Mizoram tana hmasawnna hna hrang hrang thawh nan cheng vaibelchhe 42,972 a pe tih a sawi a. Central Scheme hrang hrang hnuaia Mizoram mipui sang tam takin hamthatna hrang hrang an dawn leh an hmuh te a tarlang bawk a ni.

Thusawitu dang Chief Minister Zoramthanga chuan Mizoram chu state dangte nen khaikhin chuan chak lakna tur chi hrang hrang a nei tlem bik hle a. Chutihrual chuan a chhunga awm sa leilung hausakna awmte a tangkai thei ang bera hmanga ram tihhmasawn leh intodelh theih nan hmalak zel a nih thu a sawi a. Chung hmalakna hrang hrangah chuan sawrkar laipui puihna pawh mamawh a nih thu sawiin Mizoram chu India rama mi mal sum lakluh Per Capital Income san berna a nih theih tur thu a sawi.

DoNER Minister Jitendra Singh pawhin State tenau, tlawh harsa leh hnufum bikte ten, state hmasawn dangte nena pheikhai rual taka hmasawnna kawng an zawh chu Prime Minister Modi kaihhruai sawrkar duh dan a ni tih sawiin a ruala hma kan sawn loh chuan duh angin ram a thang thei lo a ni, a ti.

Kum 5 kaltaa Mizorama hmasawnna thleng hi kum 65 kal ta nena tehkhin chuan a danglam hle nia a hmuh thu Jitendra Singh chuan a sawi a, an sawrkar chuan vote-bank politics an ngaihtuah lova, hmasawnna chiah an veiin an ngaihtuah tih a sawi. Thalaite eizawn nan leh hna zawn nan Hindi thiam a pawimawhzia Mizoram Chief Minister pawhin tum eng emaw zat sawrkar laipuiah a thlen tih a sawi rualin Hindi zirtirtute dah ngheh an nih tur thu a sawi bawk.

Exhibition hi NEC leh Mizoram sawrkar tangkawp buatsaih niin October 8, 2019 thleng a awh dawn a ni.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh