ZALEN, Sept. 21, 2024: Sports Minister Lalnghinglova (Tetea) Hmar chuan tunlai khawvelah inelna a sang tawh tih sawiin, “Kan thalaite hi a ngai renga in awm a hun tawh lo,” a ti.

Inrinnia Thuampui Branch YMA-in Thuampui Venglai Presbyterian Kohhran Hall-ah an venga zirlai leh infiammi tithate lawmpuina leh chawimawina hun an buatsaih chu khuallian niin a hmanpui.

Sports minister chuan thalaite chu hmasawn duhna rilru an neih a ngai tih a sawi a, “Chumi atan thil in tih dan in thlak a tul ang a, a kalkawng lo bibohin lo harsa mah se beidawng lovin hma lam pan zel thin ang che u,” tiin a fuih.

Tetea chuan zirlai leh infiammite nunah a bik takin hun vawn thiam a pawimawh dante sawiin hun tha kan hman thiam a pawimawh a, kan hun tha neih hi ho mai mai a hmang ral lova bawhpelh lo turin a chah.

Hma lam hun atan zirlaite chu tun atanga an inbuatsaih tan a tul dante sawiin tih tak takna nen an thil tum tihlawtling ngei turin an rilru an buatsaih a pawimawh a, chubakah rilru bur chatna focus neih a ngaih thu a sawi.

Thalai kalkhawmte chu Thuampui veng danglamna thlentu leh veng timawitu ni turin a chah bawk.

Er. K Lalrinmawia, President, YMA Thuampui Branch kaihhruaiah hian zirlai titha mi 111 (HSLC 44; HSSLC 44; graduate 13; post graduate pasarih leh diploma pathum) leh infiamna lama mi chhuanawm mi pathumte hnenah lawmpuina leh chawimawina an hlan a ni.