ZALEN November 14, 2025: Mizo National Front chuan vawiin khan Mizo Hnam Runah Chhung Inkhawm neiin, he huna thusawitu MNF President Zoramthanga chuan Dampa bial by-Election ah chakna an chang a, an tih tur hmasa ber a nih angin Pathian hnenah lawmthu an sawi a ti. 

Zoramthanga chuan, "Kum 2023 inthlanah ZPM thlipui a tleh a, a thawm pawh a la reh mumal lo a, chumi karah kan thawhhona, tanrualna leh inpekna Lalpa'n mal min sawm a ni. Kan MLA ropui tak Pu Lalrintluanga Sailo hmun ruak luah tura Dr. R. Lalthangliana, Sr. vice President, MNF thlantlin a ni hi kan lawm takzet a ni," a ti.

"Dampa bial by-Election ah invauna leh intihthaihna nen, thlémna nen CM hovin an bei a, an hotupa ber chuan Yellow Card Election Commission of India atangin a hmu ta a. Hotupa ber leh Candidate an tawng fuh hlei thei lova, ECI in CM leh ZPM President te zilhna thu a pek chu Chanchinbu dang leh Vanglaini chanchinbu meuh pawhin langsar takin a chhuah zui a ni," a ti bawk.

MNF President chuan, MNF party chu a tirte ah Silai nen a bul tanin, Kohhran, YMA leh kan Nu leh Pa te meuh pawhin min tan ngam tawh loh karah, a tlusawp tawh leh kehthem tete chu chhar khawmin bul tan leh a ni. Mipui pawhin hotute leh thawktute min sít pawh kha a awm em em a ni. Delhi lam atangin MNF chu a ral dan tur ngaihtuahin, Pu Laldenga chu Tihar Jail-ah an khung a, Pu Laldenga emaw an do an ti a, 'Pathian leh kan ram tan' tih thuthlung neitu zawk a ni an do tih kha an hre lo a ni. Kan chapo hlauvin kan opponent-te Pathian chuan a chawisang thin a, a hun takah MNF sut keh pawh nilovin, party 30 Chuang zet chu anmahni an lo in su keh tawh a ni, Pu Zorama chuan a ti bawk.

MNF President chuan, "Engatinge, hun harsa thlen dawna MNF te Pathian-in sawrkarna min pek thin; Mautam, Economics crisis, Kangmei, Vawk púl, Covid-19 leh Assam nena ramri buaina te?, tia a ngaihtuah thin thu sawiin, a hun takah che thin Pathian hi a tlái sual palh ngai lo, 'in chhelin, in nun in chhanhim ang,' tih thu vuan tlattu kan ni tur a ni. Harsatna paltlanga huai taka pen zel tura Pathianin a chherhriamte kan ni. Inthlan lo awm leh tur 2028 ah chuan MNF tlinpui kum a thlen a rinthu sawiin, thlamuang taka awm tur a ni," tiin, Party mipuite a chah bawk.

MNF Treasurer Lalruatkima pawhin thu sawiin, Dampa bial by-Election campaign tantirh atanga result puanni thleng chanchin tarlangin, 'lungrualna hi ram leh hnam tan himna kulhpui ber' a nihna a lang a ni, a ti. Dampa bial mipuite hnenah lawmthu kan sawi a, 'Arsi lian a lo chhuak a, chu Arsi lian chuan 2028 a én dawn a ni," tiin, report a pe a ni.

Chhung Inkhawmah hian Pathian hnena lawmthusawina leh a kaihhruai zelna dilin tawngtairualna hun hman a ni bawk.