ZALEN November 13, 2022: Vawiin November ni 13, 2023 khan ZPM chuan chhung inkhawm an nei a. He huna thusawitu an Leader Lalduhoma chuan, “Inthlan boruak thlirin sawrkarna siam ngei kan inbeisei a, sawrkarna kan siam a nih chuan party vote ni lovin ram mipui - neutral te leh Pathian vang a ni ang. Party sawrkar ni lo, mipui sawrkar din kan tumna kawngah min tawngtaisaktute leh kawng hrang hranga theihtawp chhuahtu zawng zawngte chungah lawmthu kan sawi,” a ti.

Lalduhoma chuan MPF chungchang sawiin, “Inthlan kan hmachhawn zawh takah khan MPF awm leh awm lohna a dang hle a, hmun thenkhatah MPF ngaihtheih lohna a awm nitein a lang bawk. Inthlanna thianghlim leh felfai Mizoramin a neih theihna tura theihtawp chhuahtu; a neitu pawh Kohhran leh NGO zawng zawng bakah Political party zawng zawngte kan nih avangin pawl hrang daih anga ngaih tur an ni lova, a neitu vek kan ni," a ti.

ZPM an tlin pawh party vang ni lovin Pathian leh neutral te vang a nih tur thu sawiin, "Sawrkar tha zawk nei turin mipui kan tuihal tih a lang a, kum naupang deuh, vote nei thar leh upa zawk thlengin vote thlak turin phur takin kan penchhuak tlang a, vote pawh a tla tha hle. Neutral-in vote an thlak that avangin heng mite hi kan ram tidamtu leh siamthatu an ni dawn a ni. Kum 5 chhungin party naupang ber leh sum lamah pawh pachhe berin inthlan hrang hrang– AMC, LMC, By-Election, VC/LC te kan hmachhawn a, a hautak hle a. Heti chung hian result duhawm tak tak kan nei thei a, Pathian kaihruaina leh awmpuina kan dawng hle a ni. Kuminah MLA General Election kan han hmachhawn leh a, kan result neih tur hi kan tawngtai chhannaah kan ngai dawn a. ZPM hian chunglamah thawhpuitu kan nei a, hnehna kan chang a nih chuan ZPM party vang ni lovin Pathian vang leh neutral mipuite vang a ni ang,” a ti.