ZALEN November 9, 2024 : November 7, 2024, zan khan Meitei-te chuan Zohnahthlak khua, Zairawn, Jiribam District, Manipur chu an run a. Hei mai hi duh tawk lovin Zosangkim Hmar (31) Ngurthansang Hmar nupui chu nasa taka nghaisain rawng takin an hal hlum bawk a ni. Hetiang nunrawnna a thleng hi MNF chuan pawi an ti.

Zosangkim Hmar-in a kalsan tak a pasal leh a fate - Franky Lalchawisang (3) Victoria Laldomawi (9), Lalringdik (7) leh a chhung khat lainate Pathianin awmpui mawlh rawh se, an ti.

MNF chuan, "Manipura Zohnathlak leh Meitei inkarah boruak tha a awm chhoh mek tawh laia, hetiang thil rapthlak tak mai a thleng hi pawi kan ti tak zet a. Meitei te hian lungrual taka awm tlan a, remna neih hi an duh lohah kan ngai a. Pawi khawihtuten an phu tawk hremna hmu ngei se kan duh a ni," an ti.

"Zohnathlak chi peng hrang hrang khawvel puma mite lungrual lehzuala hmalam pana kan kal a hun tak zet a. Hnam anga beihna kan tawhna nasa chho tulh tulh hi lungrualnatha nena Zohnam zawng zawngten kan lo hmachhawn a ngai a. Chumi tur chuan unau kan nih hria a, lungrual taka ke pen za turin Zohnahthlak zawng zawngte a sawm a. Zohnam puanzar hnuaiah ram leh hnam tan inhlan thar turin Zofa tawh phawt chu kan ngen a ni," an ti bawk.