Aizawl May 6, 2023: Vawiin khan May 9, 2023-a CADC inthlanna neih tur 'campaign' neih mêkah Longpuighat-ah Congress Legislature Party (CLP) Leader Zodintluanga Ralte, MLA hovin mipui inkhawm neih a ni. Congress MLA chuan an Party chu unaute tanpui turin a tlanchhe ngai lo a ti a, MNF President chu dinna tur bial la hre lo niin a sawi bawk.

He intawhkhawmna hun tan hma hian Congress MLA Zodintluanga rawtna angin CADC inthlan neih tura Candidate pakhat leh Manipur buainaa nunna chan te tan minute khat chhung ngawi renga dingin sunna hun an hmang.

Public Meeting-ah hian Manipur buaina thleng mêkah Congress Party a inhuam thui tih sawiin, CLP Leader chuan, "Tuna Manipur-a chi leh chi inkara buaina sosang tak chhuak mek avanga; kan unau, kan thisen zawmpui Zohnahthlak chi peng hrang hrangten harsatna leh manganna namenlo an tawk mek hi pawi ka ti takzet a.  Kan unaute tanpuina tur kawngah engtik lai mahin Congress Party kan tlanchhe ngai lo ang," a ti.

"Congress Party hi remna leh muanna duhtu party kan ni a, kan ram ngeiah pawh kum 20 zet buaina namenlo hnuaia kan awm hnuah remna leh muanna a awm theih nan Congress sorkar namthluin lalthutthleng hial pawh kan kian anih kha. Mizoram mai ni lo, kan thenawm hmarchhak state hrang hrang leh India ram pumah hian remna leh muanna awm se, ram chhunga a cheng mipuite inngeih leh inlungrual taka khawsakho dial dial hi kan duh dan ber a ni," Zodintluanga Ralte, MLA chuan a ti.

MNF chu Mizoram state pum inthlanah a sawrkar sawn lo nia sawiin, "MNF party an sawrkar loh turzia lanna chu an President  Pu Zoramthanga'n dinna tur bial a la hre lo hi a ni," Zodintluanga chuan a ti bawk.

Zodintluanga chuan, ni hnih chhungin CADC area-a bial 19 a fang chhuak tih sawiin, "Congress Party hi kan la tha tih ka hmu a, Congress Party that vanga kan candidate tih buai tum an awm hi pawi ka ti. An chak dawn loh vanga buaina siama By-election neih tumte an awm hial a, a tha ka ti lo hle. Congress Party mi leh sa MNF leh BJP ten pawisa pek an tum pawha la duh lo an awm erawh lawmawm a ni," a ti.

MNF party innghahna chu sum a ni, sawrkar hnathawkte hlawh pek mumal theih loh laia suma mi lei an tum hi a zakthlak. An sum sem hi mipui sum a ni. State sawrkara Congress-a Sawrkar chuan District Council a buai ngai lo, Congress a sawrkar loh chuan 'musical chair' ang mai a ni thin a, sawrkarna siam an inthlak reng thin hi a pawi takzet, Congress MLA chuan a ti.

"Kalphung thar zuartu ZPM Party hian kalphung hlui an la nei lo hrim hrim. Kalphung thar zuar tur hian an zawrh ber chu; ZPM hruaitu lu ten Chakma vote an mamawh loh thu te, Chakma vote tel lo-a sawrkarna an sawi laiin, Pu Lalduhoma hi vote dilin Chakma khaw hrang hrangah a kal hi a nuihzatthlak," a ti bawk.