Lalchhandama Colney

Kum thar lawmawm tak mai dam takin kan chuang kai leh thei ta, kan vannei hle mai, lawmthu sawi mawlh mawlh kan ba. Kum bul atanga vei ila ka han tih chu tawng chungchang hi a ni a. Hma nasa taka lak mek zel a ni a, ziah leh chhut tih vel ah hi chuan kan fimkhur ve viau in a hriat. Hetih laia vei awm riaua ka hriat chu thil sawi leh titi-na reng renga saptawng kan hmang tel nasa thin lutuk hi a ni. Chuti tak chuan saptawng hi kan dah tha thei lo vang a, a chhan chu Mizote hian kan tette atangin kan zir a, kan puitlin thlengin. Tawng min siamsaktute leh chanchin tha min hrilhtute tawng a ni a, khawvela tawng hman tlanglawn theih ber a lo ni nen, saptawng kan ngaisang em em hi chu a mak lohna lai hi a tam ve a ni. Chutih laiin kan tawng chu khawvela tawng thih boral mai hlauhthawnawm zingah a tel ve a ni tih kan hria ang. Awle, theih ang angin kan tawng a chim ral mek dan, hmalak dan tur leh a dangte kum bul tan nan sawi i’n lo tum dawn teh ang.

Chik Ve Ngai Em? – I chik ve ngai em? Han chik deuh mah teh, kan thil sawi leh titinaahte hian saptawng hi kan telh nasa tak tak a nia aw! Tlar khatah hian thumal pahnih, pathum, pali dawn laite telh chang kan nei, a lo mak hle mai. Entir nan, ‘Naktuk chu Thawhtan,’ han tih turah te, ‘Naktuk chu Monday,’ ‘kar tawp’ han tih mai turah te pawh, ‘weekend,’ kan ti deuh kher thin.

Kan rilru suangtuah leh ngaihtuahna velahte pawh hian, kan hriat loh kar hian kan lo hmang nasa hle. Entir nan, ‘pakhat, pahnih, pathum,’ han tih mai turah te pawh, ‘1, 2, 3,’ tiin kan ngaihtuah tlat thin bawk.

Dawr hmuna thil tar reng rengahte pawh hian Mizo tawngin kan ziak ngai mang lo; mahse, hetih lai hian a hmangtute chu Mizo hlir kan ni tho si. Radio,T.V., Live phone-in/Discussion hun buatsaihahte pawh hian kan mi thiamte hlei hlei hian saptawng hi an telh nasa emaw tih mai tur a ni.

Kei ngei pawh hian saptawng hi ka lo telh ve na sa, Mizo tawnga dah theih tho turah pawh hian. Hman loh theih loh hun chu a awm ve tho a; mahse, tunlaia kan hman dan hi chu ngaihtuah chian deuh chu ngaiin ka hria.

Hnam DangTe – Hnam upa zawk leh changkang zawkte hi chuan saptawng hi an hmang tha duh mang tlat lo. An thiam lo pawh a ni lo, han biak pawh hian Hindi emaw hian mi an chhang hmasa thin. An rilru tur awm ang deuhah chuan, ‘saptawng hi kan tawng a ni lo, ram dang tawng a ni, kan tawng hi ka ngaisangin ka ngai hlu fe zawk,’ an tihna deuh a ni.

Nia, PM-ina UNO leh a dang a thu a sawina reng rengah pawh hian Hindi ngat hian a sawi thin. Saptawng chu thiam lutuk,lo ngaithla tu tan pawh rem chang zawk; mahse, saptawng chu hmang chuang lo, ‘Indian ka ni,’ a ti tlat a ni.

Russia ramah pawh hian saptawng an hmang lo, an mahni tawng ngat an hmang a ni, duh se chuan hmang thei lutuk; mahse, an tawng an ngaisang zawk a ni. Chutiang bawkin France, Germany-ah te pawh saptawng an hmang lo, anmahni tawng ngat an hmang a ni.

India hmarchhakho zingah hian khung Khasi-hote khuan saptawng an hmang nasa, thiam pawh an thiam; mahse, an entawn tlak loh, Bengali leh a dang hote khuan an chim ral anih deuh ber tawh khu.

Hnam changkang leh ropui apiangin mahni tawng an ngai hluin an dah hmasa thin, changkang lote erawh chuan kan tidufdah thin.

Tan I La Ang – Eng tin nge tan kan lak ang aw, ngun takin han ngaituah ta ila, thil ka sawinaa ka hman thin te kha, a tlukpui Mizo tawnga dah han tum ta ila. Saptawng aiah Mizo tawng, entir nan, Wednesday-ah birthday ka lawm dawn - Nilainiah ka piancham ka lawm dawn, tih ta zawk ila. ‘Good morning,’ han intih aiah te pawh, ‘Zing chibai,’ te emaw han ti ila.

Kan suangtuahna lamahte pawh saptawnga ti thin lovin Mizo tawng hlir a tih tum ta ila. Dawr hmun a kan thil tarte pawh hi a tluk pui Mizo tawnga tih tum ta hram hram ila. Radio, T.V., chanchinbuah pawh Mizo tawng hman uar duhna lam thu tihchhuah tam ni thei se. Tin, kan mi thiam leh mi pawimawhhote pawh hian saptawng hi telh tlem ve thei sela, chumi tur chuan lo inbuatsaih ve thin se. Kan ngaihtuahnaah saptawng hman tlem telh telh, Mizo tawng hman tam tulh tulh hi lian thei se.

Kan tawng kan ngaihsan hian hma kan sawn, changkang telh telh zel a ni, kawng dik kan zawh tih in hre ta ila. Saptawng thiam tak chungin Mizo tawng hi uar, hman zawk zel tum ta theuh ila.

Mi pangngai chin intite chuan kan hria ang a, hnam tih dan, zia, tawngte, kan hnam innghahna, lungphum a ni tih. Mizote hian hnam dang sap, Korean kan tihhote kan ngaisang hle a, a tha viau a; mahse, mahni intheihngilh khawp khawp hi chuan ti lo ila, chintawk neih tum ila, chu chu mi puitling zia pawh a ni zawk ngei ang.

Saptawngte pawh kan ngaisang, kan uar, a tha alawm; mahse, chintawk neih tum ila, hnampui tawng a ni a, kan tawng hian a ngam dawn miah lo tih kha hre bawk ila, chuvang chuan kan inven a ngai ve a ni. Tunlaia kan tawng kan hman danah hi chuan kan ti lutuk lo maw aw, a tih theih.

Eng pawh nise, mi puitling theuh kan ni a, mahni tawng humhalhna chang hria, ngaihsanna chang hria kan ni hlawm a, kan tawng chu kan chim raltir em lo vang chu maw, chhiartute Kum thar Chibai vek ule!