Aizawl: National Academy of Burns India (NABI) leh Indian Medical Association (Mizoram State Branch) tangkawp chuan Zirtawp zan khan Aijal Club-ah kang chung-chang zirhona an nei. Zirhona tarlan danin khawvela accident vanga thihna thlentu tam ber chu lirthei chetsualna (road trafficking) a ni a , a dawtah chuan kangmei vanga thihna a ni. Malaria leh TB natna vanga thihna aiin kangmei vanga thihna hi tam zawk anga chhut a ni bawk. India ramah hian kum tin maktaduai 7 kang natna tuar an awm ang a chhut a ni. District Hospital Aizawl a kum nga chhunga kangmei vanga admit-te zirchianna neih a ni a, kum nga chhung hian kangmei vanga na tuar 78 enkawl tawh niin, zinga 9-in an thihpui ang a chhinchhiah a ni bawk. District Hospital Aizawl record-ah chuan kangmei vanga a natna tuar damdawiin a admit-te hi thlasik lai, November leh March inkarah an tam ber a, March thlaah tam berin July thla hi a tlem ber thla a ni thung. Mi thiamte chhut danin kangmei vanga hliam tuar 90% chu pumpelh theih niin an sawi a. District Hospital Aizawl record bika a lan danin kang thlen thei tu chi hrang hrang zingah tuiso kan leh mei (Flame burn) kan chu a tam ber a ni.