Aizawl; Fire Department hotu chuan kangmei laka invenna mipui hrilhhriat kawngah an ti tha tawk nia a ngaih thu a sawi rualin ngaihzamna chu kangmei thlentu tam ber niin a sawi bawk. . "Mizo mizia hrim hrim hi thil la zam chi; thil ti thlip thlep peih lem lo, invawng tha te 'chimlim' tia sel zui ching kan ni a. Mi pangngai awm taka ngaihte pawhin an duh duhna hmunah meizial bung pen per a, chil an chhak mai a. Kangmei chhuah chhanah pawh inthlahdahna hi a chhan lian ber a ni," tiin Lalthanmawia, SP Fire Department chuan ZALEN a hrilh. "December ni 31 zana Peter Street-a kangmei chhuak pawh kha petrol chhekkhawl vang a ni a, dan ang chuan hetiang thil hi phalna nei lote'n an kawl teuh thei lo a, case siamsaka man tur an ni zawk a. Hei hian ngaihzamna kan neih len zia a tarlangin ka hria," a ti bawk. Fire SP chuan kangmei veng tur chuan a bul thut mawl te te ah fimkhur a ngai a, gas reguslator mut hmaa herhhlum, mut hmaa mombati tih mih leh a dangte a nih thu sawiin Fire SP chuan, "Kan lungmuang hmaa,thil lakzam (easy going) hian that lohna a nei a, a nghawng pawh a na thin," tiin mipuite a chah bawk a ni.