Kanye West hi Kim Kardashian nen an inthen hnuah a luck sawt zawk emaw tih mai tur a ni - tunah pawh nupui a nei leh der tawh! An inthen hlim khan Russian super model chhe lo Irina Shayk nen an inzui a, chumi hnuah Yeezy designer Bianca Censori nen inzui lehin an innei zui ta a ni. 

Kanye West leh Bianca Censori te hi January 12, Ningani khan Beverly Hills, California-ah an innei nia tarlan a ni. Mahse an inneihna hi dan ang thlap a nih loh avangin hming an sign lo a, zungbun erawh an inpe tawn nia tarlan a ni. 
An inneih thu hi puanzar a ni lo a, a ruk thei ang berin an ti a nih hmel hle. 

'Gold Digger' hitmaker Kanye leh Bianca te hi Waldorf Astoria Beverly Hills hotel-ah ni eng emaw zat an khawsa dun a, hemi hnu hian an innei zui ta a nih hmel hle. 

Kum 45 mi American rapper hian Adidas thawhpuiin Yeezy brand an din a, a company dinah hian Bianca Censori hi a thawk. Yeezy-ah hian November 2020 khan architectural designer turin a lut a, heta tang hian Kanye West nen hian an intawng chho a nih hmel hle. 

Kanye West leh Kim Kardashian te hi kum 2014 khan an innei a, fa pali North (9), Saint (7), Chicago (4) leh Psalm (3) te an nei. Kum 2021 khan Kim hian a pasal Kanye lakah hian inthen dilna court-ah a thehlut a, March-ah inthen zuiin, an inthenna hi November 29, 2022 khan official-in court chuan a puang a ni.