Kanye West leh Kim Kardashian te chuan dan angin an inthenna chu an chingfel ta a, court chuan Kanye West hi an fate enkawlna turin Kim Kardashian hnenah thla tin $200,000 pe ziah turin thu a pe. West leh Kim te hian fa pali an nei a, an fate hi Kim chuan a enkawl dawn a, a senso hi an intum sem dawn a ni. 

American rapper leh reality TV star te hi kum riat chhung an innei hman a, mahse Kardashian hian kum 2021 khan court-ah inthen dilna a thehlut. Kumin March thla khan an inthen tih thuchhuah siamin an tarlang ve ve a, Kardashian pawh hian a hming tawpa 'West' a telh pawh a paih nghal a ni. 

An inthenna hi November 29, Thawhlehni khan court chuan a ching fel ta a, an fate enkawl dan turah pawh ruahmanna siam fel nghal a ni. An fate - security, school leh college kalnate chu an intum sem dawn a, hei bakah hian Kardashian chu a enkawltu tur zawk a nih avangin West chuan Kim hnenah hian thla tin  $200,000 a pe dawn bawk a ni. Kim leh West te hian fa pali - North (9), Saint (6), Chicago (4) leh kum thum mi Psalm te an nei a ni. 

Adidas, Gap leh Balenciaga te chuan tun hnai khan Kanye West an thawhpuina an titawp a, a talbuai lai tak a ni. Hetih lai hian kum 45 mi West hian a hming chu 'Ye' tiin a thlak a, kum 2024-a US president thlanna neih turah a chuh ve leh dawn bawk. KUm 2020 khan a lo chuh ve tawh bawk a, vote 70,000 vel chu a hmu ve a ni.