ZALEN December 7, 2024 : Public Works Department Minister Vanlalhlana chuan vawiin khan Sihhmui-a Tlawng Lei rem khawm, dawh kai tur enchhinna a tlawh a, lei hi ruahman anga hna kalpui a nih chuan kar leh chhung hian dawh kai hman beisei a nih thu a sawi.

Trial launch an neih naah hian PWD Minister chuan Mizoram kawng pawimawh tak thlunzawmna tur Tlawng lei remkhawm mek chu hlawhtling tak a dawh fel a nih thuai theih nan uluk takin tihchhinna 'trial launch' neih tan a nih thu a sawi a. Ruahman ang a hna kalpui a nih chuan kar leh chhung hian lei hi dawh kai hman beisei a nih thu a sawi a, lei dawh kai atanga ni 120 chhungin lirthei engchi pawhin a zawh theih tur a hawn hman tum a nih thu a sawi.

Minister chuan Khawvel thiamna changkang tak hmanga lei remkhawm leh a dawh hna hi kalpui a nih avangin hun engemaw chen kawng khar a ngai chu pawi a tih thu sawiin inkalpawhna tha leh rintlak zawk neih theih nan he kawng zawhtu mipuite chu hun rei lo te chhung lo la dawh hram hram turin a ngen.