Karnataka Leader of Opposition (LoP), Congress hruaitu hlun, Siddaramaiah chuan Karnataka assembly inthlan lo awm turah an party chuan bial 130 aia tam an lak dawn thu a sawi.

Zirtawpni khan Siddaramaiah hian ANI hnenah inthlan a chuh hnuhnung ber a nih tur thu leh politics a chawlhsan zui tawh tur thu a sawi.

Siddaramaiah chuan, “Ka pianna khua awmna, Varuna bialah ka chuh dawn a. Tun hi inthlana ka inlan hnuhnung a ni ang a, inthlan politics chu ka chawlhsan zui ang,” a ti.

Politics-ah erawh a la tel reng dawn thu a sawi a; mahse, inthlan chuh leh Delhi-a chanvo sang ang erawh a nih dawn loh thu a sawi.

Siddaramaiah chuan Congress chuan bial 130 aia tam mah an lak tur thu a sawi.

 “Bial 130 chuang kan beisei a, Congress party hi hneh takin kan tling ang a, mipuiin sorkar an thlak ang,” a ti.

Congress hian Ningani khan inthlana an candidate tur list 42 an puang leh a, Siddaramaiah hian Kolar chuh tel a duh nia sawi a awm mek laiin he bialah hian tunge ding dawn puan a la ni lo.

Congress hruaitu lawkte chuan Siddaramaiah hi Mysuru district-a Varuna-a chuh turin an duh a, a fapa, Yatindra Siddaramaiah pawh kum 2018 inthlana a lo chak tawhna kha a ni.

Congress hian tun hnaia BJP leh Janata Dal (Secular) atanga an party zawmtute pawh dintir an tum.

Congress hian March 25 khan an candidate tur hming 124 an lo puang tawh a, hetah hian chief minister hlui, Siddaramaiah leh State Party president DK Shivakumar te pawh an tel.

Karnataka-ah hian May 10-ah neih a ni dawn a, May 13-ah vote chhiar a ni ang.

Thutna 224 awmah tunah hian MLA 119 chu rorel lai, BJP niin Congress-in 75 leh an thawhpui, JD(S)-in 28 an nei mek.

Eptu, Congress-in chuhtu tur mi 166 leh JD(S)-in 93 an puang tawh a, BJP erawh chuan an la puang lo.

BIAL INCHUHNA THLENGAH INPUH TAWN

Inthlan boruak a len mek laiin Congress leh BJP chuan an party chhungah candidate inchuh avangin an buai ve ve niin an inpuh tawn.

Congress chuan candidate 166 an puan tawh laiin BJP-in an la puang lo va. Congress thupuangtu, Randeep Singh Surjewala chuan BJP minister hlun tak tak, Chief Minister Basavaraj Bommai thlengin, miin an nin tawh avangin an dinna thlak an tum niin a sawi.

Surjewala hi chhangin BJP Rajya Sabha MP Lahar Singh Siroya chuan mi dang sawi lovin Siddaramiah dinna tura an buaina chu ngaihtuah zawk turin a ti. 

Surjewala a chhannaah Siroya chuan Siddaramiah hi kum 2018-a a tlinna, Badami leh a chak lohna, Chamundeshwari bial atangin ‘a tlanchhia’ niin a sawi.

Siddaramiah hian bial hnih chuh a duh nia sawi a ni a. A hmain Kolar bialah a chuh dawn tih a sawi zet a, Varuna-ah a ding leh si dawn tih a sawi a. Tunah hian Kolar-ah pawh chuh leh a duh tel a, an party hian mi pakhatin bial khat a kalpui avangin thil an la tichiang lo. 

Congress-in candidate an puan teuh tawh laiin rorel lai, BJP chuan an la puang lo va, an puan thuai a rinawm a, bial inchuhna a awm nia sawi a awm reng.

May 10-a inthlan tur Karnataka-ah hian chuh tumte tan April 20 thleng hming pek theih a ni ang.