Premier League season tawp a hnai a, tun kar tawpah pawh chin fel theih a awm ta nual mai. Tun kar tawp inkhel hi thenkhat tan mittui titlatu a nih theih laiin lawm taka thawh rah seng pawh an awm thei dawn.

Nomawi la tura inbeihna a nasat tluk zetin tlahniam lo hram tura inum boruak a sang hle a. Vawi thum emaw chauh khelh tur awm tawhah chhiarkawp dana chhutin season leha Championship-a tla thei team sarih zet an la awm.

Bournemouth, West Ham Unite, Nottingham Forest, Everton, Leicester City, Leeds United leh Southampton te an ni.

An zingah hian Bournemouth leh West Ham bik hi tlahniam thei la ni mah se an hnuaia mite ai chuan an dinhmun a tha a, an kar a zau deuh tawh a. Inbei nasa ber ber tur chu a dang team nga hi an ni.

Fulham-in Saints an pet thla dawn em?
Tun season tluana team talbuai ber chu Southamton tih loh theih loh an ni a, vawi 35 an khelh tawhah a mawng phahah awmin point 25 chauh an la thawk chhuak.

Point 30 hmu tawh, Leeds leh Leicester nen a hniam pathum an ni a, an chunga mi chiah an phak lohna pawh point nga lai a la ni bik a. An chung lehah Everton-in point 32 neiin Nottingham Forest-in 33 an nei a, tun dinhmunah a him chinah chiah an awm a, Toffees hian him hram an tum hle.

Southampton hian Fulham an mikhual dawn a, Everton aia point ruka aia tama an hniam a thiang tawh lo.

Fulham hi an hneh lo emaw, an hnehtawk emaw pawh ni se Southampton tan him ngaihna a awm tawh lo, chak a ngai a ni tawp.

An chak lo a nih chuan Everton an phak lohna hi point sarih emaw, riat emaw a ni zui tawh dawn a, khelh hnih (point ruk) chauh an hmabak tawh dawn si avangin him ngaihna a awm tawh dawn lo.

Fulham hi an lo hneh a nih pawhin Saints hi tla thei an la ni tho va, Manchester City-in Everton an tlawh dawn a, champion lai hian point an hmuh lohva Toffees-in point thum an hmuh chuan an tla dawn tho.

Heng chhut hian Southamton tan kartawp pawimawh a ni a, khelh hnih la bak chunga tla thei an ni mek.

Foxes leh Leeds la him dawn
Leicester leh Leeds erawh tlahniam thei dinhmunah awm mek mah se tun kartawpah bik chuan an la tla dawn lo va; mahse, Southampton titlatu an ni ve ve thei thung.

Everton hi chak lovin Southamton hi him thei mai an ni lo va, Leicester leh Leeds hian point an hmu ve ve a nih chuan Saints tan phak ngaihna a awm tawh chuang lo.

Leeds hian Newcastle an tlawh dawn a, Leicester hian Liverpool an mikhual dawn thung a. Southampton hian Fulham an mikhual dawn a, anmahni tantute hmaah an tla thei.

Europe-a tute nge ni dawn?
Premier League-ah hian a chung leh a hnuai inum a nasat tluk thovin a laihawl chung hreta season thara Europe-a inlan tumte intlansiakna pawh ngaihthah theih a ni lo.

Tottenham-in Champions League khelh phak an tumna chu tun kartawpah hian a bo thei a, Manchester United tan kawng a kaw ve thung thei.

Red Devils hian Wolves an tlawh hunah an chak a niha Tottenham-in Aston Villa an hneh lo emaw, an hnehtawk emaw chauh a nih chuan an tan Champions League beisei phak a ni tawh lo vang.

Vawi hnih khelh an la nei dawn a, palinaa awm, United aiin point riat emaw, kua emaw laiin an hniam tawh dawn a ni.

Spurs aia point hniha hniam mek, Brighton pawh kartawp hi an beiseina tinungtu a ni thei ve bawk.

Arsenal an tlawh dawn a, chak lo hawin United chak pawh ni se Seagulls-in point 55 leh Red Devils-in point 66 an nei dawn a. Mahse, Brighton hi khelh li la nei bik an la nih dawn tho avangin point 12 hmuh theihna a la awm a, kawng khirh deuh tawh mah se an beisei an la tibo thiang lo vang.

Chhiarkawp dana chhut zel chuan Aston Villa an chaka United an chak lo a nih chuan Unai Emery-a’n Champions League a thlirna a tawp nghal dawn bawk a, Newcastle leh United ten Europa Conference League emaw, Europa League emaw an khel dawn tih a chiang nghal thung ang. Mahse, team hnih hian an tum ber chu Champions League a ni thung.

Liverpool pawh sawi bo theih an la ni lo va, tun hnaia che tha tluang hian Champions League an la thlir ve a; mahse, Newcastle tan kawng a zau rih viau zawk.

Liverpool an chak lohva Newcastle-in Leeds khelmualah hnehna an chang a nih chuan Magpies hian point rukin an tlansan dawn tihna a ni a. Vawi hnih khelh chauh an neih tawh dawn avang leh Newcastle hian an aia goal difference an neih that viau zawk bawk si avangin an tan lehpelh ngaihna a awm tawh lo tluk a ni ang.