ZALEN, February 15, 2026: Press Information Bureau (PIB)-in Mizoram Journalists’ Association (MJA) member-te tan press tour a buatsaiha kal turte chuan Pathianni chawhma khan Aizawl chhuahsanin Jammu & Kashmir an pan.

Press tour-ah hian PIB, Aizawl Head of Office Rajeev Laurembam hoin Aizawl leh district hrang hranga MJA member 13-te telin PIB, Srinagar ruahmannain Jammu & Kashmir hmun hrang hrang an tlawh ang.

Zin chhuak turte hi Doordarshan Kendra, Aizawl Regional News Unit Director Nampibou Marinmai-a’n Aizawla PIB pisa kawt atangin a vai liam.

Marinmai chuan PIB-in MJA member-te tana press tour a buatsaihsak che chu a lawmpui thu sawiin, “Press tour hi press mite tan a hlu hle a, thil tam tak zir chhuah theihna a ni a. Kashmir-ah thil tha zir chhuah ngei tum turin inbuatsaih ula, in kalna hmuna in hmuh leh hriatte hmangin Mizoram tan thil tha rawn hawn in tum tur a ni. In thil tawnte in media theuhah in ziak chhuak ang a, chu chu Mizoram mipuiin an lo chhawr tangkai ve thei dawn a ni,” a ti.