April 16, 2024; Tum khata Kawlphetha leina atana sum pek chhuah tam ber ni turin Rs. Vbc. 81.69 finance department in tunhnai khan a pe chhuak. 

Chief minister Lalduhoma'n a official instagrame page a a tarlan danin, December, 2023 thleng-a Mizoram pawna Central Power Generating Station atang te leh Transmission Company te, Mizoram chhung Tuirial Hydel Project atang te a Kawlphetha lei tawhna man ba la pek loh tlingkhawm leh, February, 2024 thlenga Vankal Solar Park atanga Kawlphetha siamchhuah lei tawhna man ba la pek loh tlingkhawm, a vaiin Rs. 81,69,49,255/- chu April ni 12, 2024 Zirtawpni khan Mizoram State Finance Department chuan a pe chhuak.

Hei hi tum khatah Kawlphetha leina atana sum pek chhuah tam ber a la ni a, chumai bakah Power & Electricity Department in Kawlphetha leina man pek tlakna atan thlatin Aizawl North Treasury Office ah Cheque an thehluh tang khang mek te a zavaiin pek tlak vek a ni ta hi thil chhinchhiah tlak tak a ni.

Kum 2023 2024 ah Kawlphetha leinana Budget-a sum awm zat chu Rs. Vbc. 414a ni a, hei hian kum kal ta 2022-2023 a ba la pek kimloh pek nan hman a ngaih tel avangin kum kallai December, 2023 thlenga Central Generating Station (CGS) te atanga Kawlphetha leina man pek nan a daih tawk chauh a, January 2024 atanga March 2024 chhunga Mizoram in Kawlphetha kan hman ral tawh leina man chu Kum 2024-2025 Budget atanga pek turin chak taka hmalak chhunzawm mek a ni.

Mizoram chhunga hman tur Kawlphetha leh a kal kawng transmission line hman man te a hun taka pek ngailoh vanga pek tlai man pek belh ziah ngai (hei hi Late Payment Surcharge tih ani) thin tihbo mai bakah, pek huntiam chhunga pek theih vanga thla tinin chawhruala Cheng Nuai Sawmli (Rs.40.00 lakhs) vel pek ngailo zawk thei turin (hei hi Rebate tih a ni) Mizoram Sorkar chuan hma a la zel dawn a ni.