ZALEN October 24, 2025: Mizoram chak lakluhna kawngpui Aizawl- Silchar National Highway kawng chhia avanga lirthei tang te inhnuhchhuah an tumna lamah truck driver pakhat Assam lam mi chuan nunna a chan.

Kolasib Times-in a tarlan danin Nimin chhun dar 12 vel khan Kawnpui leh Sairang inkar Khamrang ah Aizawl pana tlan leh Kawnpui pana tlan Truck-in Truck Driver Diponkar Gogoi kum 36 mi, Assam Golaghat-a cheng chu a chil hlum a, a ruang hi Kawnpui PHC ah postmortem a ni. Driver Diponkar Gogoi ruang hi a chhungten an la a ni.

Kawnpui lam pana tlan Truck ruak hi Kawng chhia ah a tang a, Aizawl pana tlan Truck rit phur hian a hnuk chhuak a, a hnuhna hrui an phelh laiin Aizawl pana tlan Truck hi a hnung tawlh thut a, Truck ruak khalhtu hi a chilh hlum a ni. 

Kolasib Times-in a tarlan danin Truck Owners Association chuan vawiin khan kawng hi an enho leh a, Khamrang leh Kawnpui inkar kawng te zawh chhuakin, an pawl President B Lalzarzova chuan Zoram mipui chak lakluhna ber heti tak maia a chhia hi hriatthiam har an ti a ti a, kawng siamtu tur chu NHIDCL a ni emaw, sawrkar a ni emaw, an harsatna tawh chu sutkian tul an ti a ni.

B. Lalzarzova chuan National Highway a chhiat avanga an tawrhna te sawiin, an motor a chhiat phah bakah an inhnuhchhuah tumna lamah hnamdang mi pawhin nunna a chan phah hial tawh a ti a, ruahtui a han tan a, engtiangin nge hmalak chhoh a ni tih hi an ngaihven a ni a ti.