ZALEN, Sept., 27, 2024: Mizoram châk lak luhna kawngpui ber, Vairengte leh Aizawl inkar, National Highways 306 & 06 zauh hna leh enkawl hna thawktu, National Highways & Infrastructure Development Corporation Limited (NHIDC) chuan an kawng enkawl zui nan sum an nei tlem tih an sawi a, kawngte chu November atanga black top tan theih an inbeisei thung.

Zirtawpni khan Kolasib DC Conference Hall-ah Robert C Lalhmangaiha, Kolasib DC kaihhruaiin NH 306 & 06 thawm that hnathawh kal meka monitoring committee review meeting neihah NHIDCL aiawha tel, Manager (P) Saksham Tyagi chuan an harsatnate a sawi.

Tyagi hian an hnathawh dan tlangpui sawiin thuang lia tlan theih kawng sialah an insawrbing a, kawng enkawl zuina leh thawm thatna (maintenance) atan chuan sum (fund) a tlem hle tih a sawi a, “Hnathawh a harsat phah,” a ti.

An harsatna dang a sawi zingah quarry neitute hnathawkin kawng leh tuiluankawrah stone dust leh lei nawi tla a tam a, hei hian hnathawh a tihharsat bakah tui a titling a, “Hei hian hmasawnna a timuang hle,” a ti.

NHIDCL hotupa chuan kawngpui black topping-na tur tender an chhuah chu chhang an awm nual tawh niin a sawi a, “November thla atangin hmun thenkhatah hna tan theih a ni tawh ang,” a ti.

Thutkhawm hi Kolasib district-a NH 306 & 06 chhia avanga Kolasib District Truck Owners’ Association (KDTOA) leh JAC Co-Ordination Committee ten August 22, 2024-a kawng an dan hnu, August 23, 2024-a inremna leh chak zawka hna thawk tura intiamkamna lehkha an ziah anga an hmalakna awm tawhte thlirletna a ni a. JAC hian kawng siam that mek an vilnaa an hmuh leh rawtna an tar lang a, Mizoram PWD leh NHIDCL ten an hmalak tawhna an tar lang bawk.

KDTOA leh JAC Co-ordination Committee hian an intiamkamna anga chhutin MPWD NH Div 3 chanah hmalakna 55% vel leh NHIDCL chanah hmalakna 45% vel hmu-ah inngai tih an tar lang a, theihtawpa tan an lak zual zel a ngai tih an sawi tel.

Thutkhawmah hian a chak thei anga hmalak chhhunzawm ni se an ti a. KDTOA leh JAC Co-ordination Committee bakah Sub Hqrs YMA chu additional DC chairman-na hnuaia monitoring team-ah tel tawh tura tih niin anni hian kawngpui siam mek hmalakna hrang hrang an endik thin ang.