ZALEN Oct. 13, 2025 : Kolasib district a lirthei hmanga eizawng pawl hrang hrangte chuan Vairengte leh Sairang leh Kolasib leh Bairabi inkar kawng chhe lutuk chu sawrkar thuneitute'n October ni 19 thlenga an la siamthat loh chuan he lai kawnga tlan tawh loh an tum.

Mizoram Tipper Association (MTA) Kolasib district leh Kolasib District Drivers' & Owners' Joint Action Committee te chuan thuchhuah siamin, Mizoram chaklakna ber Vairengte leh Sairang inkar leh Kolasib leh Bairabi inkar kawngpuite chu lirthei tana zawh hlauhawm khawpa chhia, vanduaina thleng thei a ni, an ti a. Lirthei khalhtute'n harsatna namen lo an tawk mek ani an ti.

He lai kawng pawimawh tak hi siamtha thuai turin ziakin Kolasib bawrhsap hnenah an thlen thu leh a copy hi Kolasib district SP leh Kolasib a National Highway Division EE te an pe bawk tih sawiin, lehkha-ah hian tun leh October ni 19 inkar chhunga kawngpuite hi siam that a nih loh chuan an lirtheite an tlan tawh dawn loh tur thu an ziak tih an tarlang a ni.

#ZalenNews