ZALEN Jan 23, 2025; Mizoram Truck Owners Association (MTOA) leh Mizoram Truck Drivers Association (MTDA) chuan Vairengte leh Sairang inkar National Highway kawng chhia avanga vawiin atanga tlanloh an tum chu kaltlang pui.

Mizoram Truck Owners Association atanga thudawn danin tukin dar 7 khan MTOA Site Office Rangvamual bakah Kolasib leh Kawnpuiah an tan a , Kolasib ah hian Commercial vehicle JAC te an duty nia thu dawn a ni.

MTOA leh MTDA te hmalakna hi Mizoram Tipper Association leh Kolasib District Tipper Assn te, Kolasib Dist chhunga truck driver leh Owner Jt Action Committee, leh Kawnpui Town Truck Driver Assn ten thlawpin tlan loh an tum ve bawk a, Cachar lam Truck neitu pawlte pawh din an tum bawk nia hriat a ni.

He pawla tel Truck te hi nitin mamawh ei leh bar tur bakah insakna bungrua leh bunhraw chi hrang hrang phur thinte an ni a, kawng hi zawh tlaka siam a nih hma chuan an tlan dawn lo tih MTOA leh MTDA hruaitute chuan an sawi.

MTOA leh MTDA member ten Vairengte leh Sairang inkara tlan loh an tum hi All Mizoram Petroleum Dealers Association (AMPEDA) chuan an zawm ve dawn lo a, an tlan reng dawn niin an sawi a, oil lamah harsatna awm lo turin an sawi a ni.