ZALEN October 23, 2025: MNF chuan Mizoram mamawh chak lakluhna ber, kawng chhiat nasat lutuk avanga rang taka siamthat ngiata nuar mek, Kolasib District Drivers & Owwner's Joint Action Committee (KDDOJAC) te chu Mizoram Sawrkar chuan vauna chi tinrenga a vau hnuah, vawiin hian an man ta a. Heng an mi mante hi thu delhkilh awm lova, a rang thei ang bera chhuah zalen turin Mizoram Sawrkar an phut.

MNF chuan, "ZPM sawrkar hian kawng siam nan chhiah thahnem tak mipuiah khawnin, Sawrkarna an chan atanga khawthat hun chhung zawnga kawng siamtha duh lova, mipui lungawilo tam tak thawm a rik hnu, ruahtui nasa tak a tlak hnuah a siamthat hna a thawk tan ve chauh a. Kawng chhe vei ber anga lan tumin an Minister leh MLA ten lansarh khelin kawng siam an vil a, rei vil peih lovin, kawngchhe siam lahin hma a sawn mawh em em a, hei hi lirtheia eizawng Driver leh Motor neitute tan chuan manganna tawpkhawk a ni. Mipui mamawh lakluhna ber kawngchhia hi Mizoram sumdawng leh mipui zawng zawngte tan harsatna namenlo thlentu a ni," an ti.

"An chanvo ngiata kawngtha neih thuai phutin KDDOJAC te chuan kawngpui danchah hna thawkin Sawrkar an karna kal mekah, Mizoram Sawrkar chuan fate lungawilo chu tihlungawi tum aiin, a thuneihna changchawiin vau chi tinrengin a vau a. Police tha chakna hmangin Tanina dah turin an mankhawm ta hi a pawi kan tiin, heng an mankhawmte harsatna leh phutte hi a rang theiang berin tihhlawhtlin sak se. An mankhawmte pawh hi a rang thei ang bera chhuah zalen kan phut," an ti bawk. An thilphut tihlawhtling tura thlawp kawngah MNF chuan theihtawp chhuah a inhuam reng a ni an ti.