ZALEN Oct. 16, 2025 : PWD Engineer-in-Chief H. Zoramliana chuan mipui tana harsatna siam lo tur leh an hmalakna lo ngaichang turin ngen mah se, Mamit a tlawmngai pawl hrang hrang leh lirthei hmanga eizawngtu pawlte chuan ruahmanna an lo siam lawk tawh angin, Mamit leh Aizawl inkar, Mamit leh Bairabi inkar leh Mamit leh Zawlnuam inkar kawng te siamthat phutin vawiin atangin tiamchin awm lovin heng kawngte hi an dang dawn ta.

Nizan dar 7 khan DC Conference Hall, Mamit-ah All NGO, Commercial Vehicle Owner Association te leh PWD thuneitute K. Laltlawmlova, District Bawrhsap hovin an thukhawm a. All NGO hruaitute leh Commercial Vehicle Owners Association hruaitute chuan Mamit khawpui leh District chhung khaw dang te'n harsatna an neih dan chipchiar taka sawiin, Mamit ah petrol leh diesel a awm loh thute, damlohna vanga hmunpui zawk pan ngaite tan harsatna nasa tak a thlen thu an tarlang a, tun dinhmunah blacktop mam han beisei theih a nih loh thute leh a theih ang ang a siam erawh an phut thu sawiin, tuna kan kawng dinhmun chu a chhiat em avangin, kawngpui dan avanga mipuite harsatna tawh tur pawh ngaipawimawh theilo a, dan chah tum an nih thu an sawi a.

Engineer in Chief, PWD chuan National Highway kawngah Mizoram PWD te'n thuneihna pum hlum an neih loh thu sawiin, mipuiin harsatna nasa tak an tawk tih a hriatpui thu a sawi a, October ni 16, 2025 atangin kawngpui thawmthat hna chu chak zawka hmalak a ni dawn a ni a ti a. NH 44A kawng maintain nan vbc 11 hmuh a ni a, kawng hlui maintain na tur pawisa pawh hmuh a nih thu leh NH 44A kawng siamna tur vbc 170 pawh sanction fel ni tawhin, sawrkar laipuiah chak zawka kalpui a nih theihna turin nawr mek zel a nih thu E in C chuan sawiin, mipui tana harsatna siam lo a, an hmalakna ngaichang turin a ngen a ni.

Mamit District chhung kawngpui dan tum chungchangah hian All NGO, Commercial Vehicle Owner Association hruaitute hian nizan khan PWD thuneitute nena an inbiakna thu ngaihtuahin an thukhawm leh a. All NGOs & Commercial Vehicles Association: Mamit chuan he an ruahmanna hi kaltlangpui turin thutlukna an siam ta tho a, Highway peng leh Bairabi Road (sericulture Farm) ah te duty an indah dawn tih ALL NGO & Commercial vehicles Assn. thuchhuah chuan a tarlang a ni. Tukin dar 7 atang khan duty an insiam tan tih Mamit atanga thudawnna chuan a sawi.