ZALEN September 15, 2024 : Mizoram châk lakna ber, Silchar kawng chu a chhiat nasat avangin phai lam atanga ni tin mamawh lut a tlem a, chawhmeh man a to bakah ni tin mamawh hrang hrang a vâng chho tan mek.

ZALEN thudawn danin phai lam atanga chawhmeh lo lut a to hle a, carrot-te pawh bazar-ah kg-ah Rs. 250-te a ni dawrh niin an sawi a. In sakna hmanrua, leirawhchan pawh lei tur a awm mumal loh avangin in sa lai thenkhat an buai hle a, tuialhthei pawh a vâng tan bawk.

Thudawn danin kawng chhia vang hian truck tam tak chuan Mizorama tlan turin load an la duh lo a, load la chhunte pawh kawng chhiaah an lirthei a tan thin avangin an buai hle niin an sawi.

Tun dinhmunah Sairang leh Vairengte inkarah lirthei tangkhang thahnem tak an awm mek.