Aizawl: Urban Development & Poverty Allleviation (UD&PA) in kawng kawhhmuhna sign an tar chu an zo tep tih sawiin a cheimawi lam an ti leh mek niin an sawi. UD&PA hotute chuan Zalen zawhna chhangin kawng kawhhmuhna sign an tar mek chu an phun zo tawh tih an sawi a, an phun sa rawnghnawih lam an buaipui mek thu leh an zawhna tur ‘completion phase’-ah an awm mek tih an sawi. Kawng kawhhmuhna sign hi tun thlengin 58 phun zawh tawh a ni a, Mualpui leh Thuampuia World Bank kawng luhna tih loh chu Kulikawn leh Bawngkawn inkarah phun a ni a. Tunah hian Bawngkawn junction siamthat a nih avangin hemi hmuna an phun tur hi phun theih a la ni lo a ni. He project atan hian Rs vaibelchhe 3 ruahman a nih thu UD&PA hotute chuan an sawi a. Tunah hian an ban phun tawh electric hrui nena insu buai thei deuh a awm thu leh Power & Electricity department nen an insiamrem dan turah an indawr mek thu an sawi bawk Kawng kawhhmuhna sign bakah hian zana kawng chin hriatna tur road stud (cat eye) chu Raj Bhavan kawtah enchhinna tur siam mek a nih thu sawiin UD&PA hotute chuan Traffic Police te nen an thawkho dawn niin an sawi a. Hei hi zana eng thei niin kawng lane thliar hranna atan leh lirtheite zan thima an tlan dan kawhhmuhtu atan hman a ni dawn a ni. Hmun pawimawh hrang hrang 10 ah hmun hming tarlanna ‘special board’ chu UD&PA deparment in an tar mek a ni.