Aizawl: Mizo National Front (MNF) Party chuan naktip Thawhlehni hian Aizawl leh Mizoram khawpui dangah te ‘Kawng siamthat phutna kawngzawh’ neih an tum. Kawngzawh neih an tum chungchang sawifiah hian nimin khan MNF hruaitute hian Hnam Run ah chanchinbumite an kawm a, MNF Vice President Dr. R.Lalthangliana chuan kum 7 Congress in sawrkarna an chelh chhungin kawng a chhe lutuk a, siamthat hna thawk tura an ngenna ten awmzia a neihloh avangin lungawilohna kawngzawh neih a ngai ta niin a sawi a. “Kawng zawh hi ram tana thahnemngaihna leh sawrkar benharh duh vang a ni,” a ti. Dr. Lalthangliana chuan Mizoram kawngpui enkawl turin PWD te an ringtawk nia sawiin, “A sum bawm kawltu Ministry lamin hnathawk thei tura an siamloh avang leh hnathawhna tur mamawh an pek loh vang a ni,” a ti bawk. MNF General Secretary Lalruatkima MLA chuan session kal meka Chief Minister-in kawnglaih hna pekah Mizoram sawrkarin thuneihna a neilo nia a sawi chu a dik tawk lo deuh tih a sawi a. “Mizorama kawnglaih hna lian zingah Kaladan Multi Modal leh NH 44A (Mamit kawng) te chauh a contractor hi central thlan a ni a, a dang hi chu a thawktu tur Mizoram PWD te thlan a ni,” a ti. Dr. K.Beichhua, MLA pawhin sawrkarin kawng siam a ngaihthah vanga vawiin a kawngchhia buaipui luai luai anih tak thu a sawi bawk.