ZALEN September 21, 2025: Mizoram sawrkara taxation department-in kumin (2025-26) April-August chhunga chhiah a hmuh tawh zawng zawng zat chu Rs. 5,68,82,02,210 a tling a, kawng siamna tur, ‘road maintenance cess’ a hmuh pawh Rs. 23,49,65,447 a tling tawh.

Taxation department tar lan danin, kumin thla nga chhunga chhiah hmuh tawh Rs. 5,68,82,02,210 zinga Rs. 3,93,97,83,681 chu GST atanga hmuh a ni.

Profession tax atangin Rs. 7,99,75,833 hmuh ni bawkin sales tax atangin Rs. 119,84,81,802, road maintenance cess atangin Rs. 23,49,65,447 leh entertainment tax Rs. 30,000 hmuh a ni tawh.

Hetihlai hian taxation department hian kum kal ta, 2024-25 chhung khan chhiah chi hrang hrang atangin Rs. 11,49,81,88,170 an hmu.

Sawrkar kum kalta chhung khan April, 2024-ah chhiah hmuh tam berin hemi thla hian Rs. 1,65,01,97,183 hmuh a ni a, sum hmuh tlem ber thla, September, 2024-ah Rs. 64,91,61,389 hmuh a ni.

Hetihlai hian naktuk Thawhtanni atanga a taka GST rate thar hman tan a nih hnuah GST rate tihhniam hmaa bungraw lakte pawh a man a tlahniam vek tur a ni tih State Tax Commissioner HK Lalhawngliana’n a sawi.

Taxation commissioner chuan GST rate thar hman hunah rate tihhniam tawh, man toa la zuar hriate chu taxation office-ah hriattir turin mipuite a chah a, sumdawngte chu an tax return hmangin dan an zawm leh zawm loh an hre thei dawn tih a sawi bawk.

2025-26 a chhiah hmuh dan

Thla     Hmuh zat

April, 2025   Rs. 1,79,51,94,242

May, 2025   Rs. 81,28,30,654

June, 2025   Rs. 84,79,99,728

July, 2025   Rs. 1,49,36,32,258

August, 2025   Rs. 73,85,45,328

TOTAL     Rs. 5,68,82,02,210