ZALEN February 15, 2026: Mizoram sawrkara taxation department-in kumin (2025-26) April-January chhunga chhiah a hmuh zawng zawng zat chu Rs. 10,90,56,02,316 a tling tawh a, heng zingah hian kawng siamna tur, road maintenance cess a hmuh pawh Rs. 44,48,54,322 a tel a. Commissioner of State Tax HK Lalhawngliana chuan chhiah hmu tha turin theihtawp an chhuah tih ZALEN a hrilh.

Taxation department tar lan danin kumin thla 10 chhunga chhiah hmuh tawh zinga Rs. 7,58,37,57,714 chu GST atanga hmuh a ni a. Profession tax atangin Rs. 14,69,69,769 hmuh ni bawkin, sales tax atangin Rs. 2,28,50,20,429, road maintenance cess atangin Rs. 44,48,54,322, entertainment tax Rs. 50,000 leh chhiah dang atangin Rs. 95,760 hmuh a ni tawh.

Kumin kum kal mek thla 10 chhungin April, 2025-ah chhiah hmuh a tam ber a, Rs. 1,79,51,94,242 hmuh a ni a. Chhiah hmuh tlem ber thla, August, 2025-ah Rs. 73,85,45,328 hmuh a ni bawk.

Hetihlai hian taxation department hian kum kalta, 2024-25 chhung khan chhiah chi hrang hrang atangin Rs. 11,49,81,88,170 an hmu.

Taxation department-in chhiah an hmuh that theih nan kawng hrang hrangin hma an la tih Commissioner of State Tax HK Lalhawngliana chuan ZALEN a hrilh a, kumina chhiah an hmuh tur hian nikum lam a khum ngei an beisei thu a sawi. 

ZALEN zawhna chhangin Commissioner of State Tax chuan nikum September atanga hman tan, GST rate thar hman hnuah rate thar zawm tha lo pawisa chawitir mi eng emaw zat an nei tawh tih sawi bawkin, chung mite pawisa chawi chu Rs. Nuai 10 chuang a tlin tawh thu a sawi bawk.