Aizawl September 16, 2024: Vawiin khan Chief Minister Lalduhoma chuan a office-ah Mizoram Commercial Vehicle Union hruaitute a kawm a, an harsatna te a sawipui. Chief Minister hi Vanlalhlana, PWD leh Transport Minister, TBC Adviser to CM (Finance) Lalvenchhunga leh PWD Official ten an tawiawm.

Chief Minister chuan, "Kuminah India ramin ruahtui kan dawng tha a, tuilian leh leimin a tam a. Chhiatna pawh kan tawk nasain kawngpui then fel nan pawh hian sum leh pai a kal tam hle. Hei hi kan tum anga hma kan lak chak theih loh chhan ber a ni. Ruahtui vanga kan harsatna te min hriatthiamsaka min lo ngaichang hram hram turin kan ngen che u a ni," tiin Sawrkar hmalak dan te a hrilh. Kawnpui leh Khamrang inkar hi chu remchang hmasaberah amah ngeiin tlawh a tum thu a lo hrilh bawk.

CM chuan Mizoram chak lakna kawngpui chhe zual lai Kawnpui leh Khamrang inkar chu Satguru te thawh a ni thu leh maintenance period ah a lut mek a, May 2026 thleng awh tur a nih thu a hrilh a. An maintenance period a nih miau avangin NHIDCL in a laksak duh si lova, tun hi a thleng phah tih a sawi.

"Sawrkarin an contract tihtawpsakin an maintenance fund awm ang ang hi vawiinah Mizoram PWD account-ah a luh beisei a ni a. Chung sum te leh state sumte nen chak taka umzui a ni. Hnathawktu hi hlawm thumah dah an ni a, vawiinah pawh lung trip 20 an thlen hman ang," a ti.

Inkawhonaah hian Kawng chhiat vanga tuna Sumo Service te an chawlhna zawng zawng Lung hnawha tlan theiha a rang lama siam tura ngenna chu a theih chen chen bawhzui nghal a ni dawn a. Kawng chhia vanga Sumo Service chawlhna khua te a rang lama inhrilhhriat ni se an ti.

Manipur chak lak luhna Kawlkulh leh Hliappui inkar kawng hi sawrkar chuan PMGSY 3 hnuaiah siam thar vek turin contractor thar kutah a hlan tawh a. Tuna lung hnawh nghal ngai leh lirthei tang nawrchhuaktu tur JCB duty dah turin contractor hnena ngen tha an ti.

Commercial Vehicle Union hruaitute hian kawngpui tha tawk lo vanga harsatna an tawh thu bakah tuialhthei man sang chungchang te, lirthei kaihhnawih chhiah chungchang te, fitness test thu leh state dang atanga private car hmanga rinhlelhawm taka rawn vak vel an tam thu leh a ngaihpawimawh thil dang te an thlen bawk.