Aizawl: Aizawl West II bialtu MLA Lalruatkima chuan, “MNF sawrkarah kawng chhia siam that chu hna hmasaah neih a nih dawn avang leh LPG Bottling Plant thar siam a nih dawn avangin kan kawtkaiah gas kan sem leh ang," a ti. Nimina a bial Dawrpui Vengthar a tlawhnaah he thu hi sawiin Lalruatkima chuan, “Kum 10 chhung zet Gas harsatna kan tawhna chhan ber chu kawng chhiat vang leh MNF sawrkar laia din Mualkhang Bottling Plant 5000 MTPA (Metric Ton Per Annum) Capacity in kan mamawh zat min phuhruk zawh tak loh avang a ni a. LPG phur tur hian Transportation Tender kum 5 dan velah chhuah thin a ni a, kawngpui a chhiat em avangin Transporter ten Mizoram Gas an phurh that duh thin loh avangin harsatna kan tawk ta a. Congress sawrkarah Mualkhang Bottling Plant tilian turin hmalakna a awm mumal loh bawk avangin Bolkhola BP Silchar-a mi lak a ngaih phah ta hian kan harsatna a tizual a. Gas lama kan harsatna tawh mek sukiang tur hian MNF sawrkar veleh LPG Bottling Plant thar siam turin chak takin hmalak a ni dawn a ni,” a ti. MLA hian YMA Golden Jubilee lawmna senso atan cheng nuai khat, Pedestral Fan 5, YMA Colour Tarpouline 2 leh Tarpouline 4 a pe a, MHIP te hnenah Pedestral Fan 3 a pe bawk. MLA hi R.Thanglura, Councillor-in a tawiawm a ni.