Mizoten badminton star a neih zinga hmabak êng ber ni mek, H. Lalthazuala’n hliam a tuar a, Yonex Sunrise 30th Smt. Krishna Khaitan Memorial All India Junior Ranking Prize Money Badminton Tournament (Under-19)-ah a ke a ulh avangin final a khel tluan thei lo.

Panchkula, Chandigarh-a kar kal ta Thawhlehni atanga khelh tan inelnaah hian Thawhtanni khan Chanmari West rawlthar hi Under-19 Boy’s Singles final-ah Pranauv Ram Nagalinga, Tamil Nadu nen inhmachhawnin 21-15-a game khatnaa a chak loh hnu leh game hnihnaa 11-2-a a hnufual laiin a ke na avangin a khel tluan thei ta lo.

Kum 16 mi, Thazuala hian semifinal-ah Sanskar Saraswat (Seeded No. 8) chu 21-16, 11-21, 21-17-in a hneh a, hemi tum hian a ke ding lam keartui bawr ulhin a intina a ni.

“Semifinal pawh kha ka khel tluan thei lo tep a, Pathian zarah ka chak hram a ni,” a ti a. Final-ah phei chuan kal hlei thei tawh lo chungin khelmual a lut a, ding thei mang lo chungin ti hram hram mah se a tlin ta lo tih ZALEN a hrilh.

Tata Trusts (NEIDA) sponsor-a Pullela Gopichand Badminton Academy (PGBA), Hyderabad, Telengana-a awm mek, Mizo shuttler hian a hliam chu ni hnih thum vel a awm hahdampui ang a, tournament dang a hmachhawn lehnghal dawn niin a sawi.

“Chandigarh-ah ka la awm a, trainer an awm loh avangin heti hian ka tawrh dam a ngai dawn a ni,” tiin Thawhtanni tlaia ZALEN-in a biaknaah a sawi.

Smt. Krishna Khaitan Memorial All India Junior Ranking Prize Money Badminton Tournament-ah hian India ram hmun hrang hrang atangin player 1,150 chuang zet an inlan. 

Category zinga ngaihhlut hlawh ber, Boy’s Singles huanga final lut, Thazuala hi champion zo ta lo mah se Mizo zingah Under-19-a national level ranking tournament final lut thei hmasa ber a ni ta tho va. Boy’s Singles (Under-19)-ah hian player 490 lai an inlan nghe nghe.

Mizoram Badminton Association (MBA) chuan Mizoten India ram badminton khawvela an la thlen phak ngai loh ram hruai thlenga tihmingthatu, Thazuala chu an a chhuang tak zet tih an sawi a, a hma lam hun kal zel tur atan duhsakna an hlan bawk.