Lei leh rel engine ruk bo a nih hnu lawkah Bihar-ah rukrukna danglam tak a thleng leh a, dil an ru!

Darbhanga district-a dil hi a bo ta daih a, a awmna thinah di in an ding ta daih a, tual chhung miten dil neih leh tumin an bei nghal.

An dil awmna thina di in lo ding ta daih an hmuh chuan a bul hnaia chengten police an hriattir nghal a. A lo luahtu, dila lei chhung khata in satu erawh police an thlen hian a lo tlan bo hman thung.

Tual chhung mite hian dil hi vantlang ta niin an sawi a, sangha an man thin bakah thil dang tangkaiah pawh an lo hmang tawh thin a. Hmun dang ang bawka Darbhanga-ah pawh ram man a to zel avangin tui awmna thin hmun chu a ruka thilti thinte mit a la ta ni ngeiah an ngai.

Dil hi leia chhun a nih tan hian mite hian thuneitute an hrilh tawh a, thuneitute pawh hian hna thawktute chu tawp tura an tih bakah an hmanruate pawh an mansak nual a; mahse, a rukin zanah hna an lo thawk zui a, dil chu a bo ta daih a ni.

“Mite chuan ni 10-15 vel chhungin an chhung khat niin an sawi a. Zanah vek hna hi thawh a ni a, a hma pawhin thuneituten tlawhin thil man pawh an nei,” tiin Sub-Divisional Police Officer (SDPO) Amit Kumar chuan a sawi.

Bihar-ah hian thil bo atana awm ang lo, mitthla phak loh hiala ngaih tur hi a thleng fo tawh thin.

November, 2022 pawh khan Begusarai-a rel kawng hrula an hun diesel engine pum chu tlem tlemin ruk zawh vek a lo ni tawh a. Rukrute hian leiverh siamin zawi zawiin an thiat darh a, an ru bo zo vek niin police chuan an sawi.

Kum 2022 vek kum tir lamah khan Rohtas district-ah kea kalna lei feet 60 zeta sei pawh a pumin a bo tawh a. Hemi tum hian sorkar hotu sang pakhat telin mi pariat man an ni a, thir kg 247 pawh hmuh let a ni.

Rukrute hian JCB leh gas cutter hmangin lei hi an tichhia a, ni thum chhung lekin an ro bo fel hmak a ni.